సీట్ల సర్దుబాటుపై స్పష్టత

అమరావతి, సూర్య ప్రధాన ప్రతినిధి :ఆంధ్రప్రదేశ్‌లో స్థానిక సంస్థల ఎన్నికల వేళ కూటమిలో సీట్ల సర్దుబాటుపై ఉత్కంఠ వీడింది. ముఖ్యమంత్రి చంద్రబాబు నాయుడుతో జనసేన నేతల సమన్వయ సమావేశం విజయవంతంగా ముగిసింది. భేటీ అనంతరం జనసేన నేత బొలిశెట్టి శ్రీనివాస్ మీడియాతో మాట్లాడారు. సీఎంతో చర్చలు సజావుగా సాగాయని, ఎవరి మనోభావాలు దెబ్బతినకుండా సీట్ల పంపకాలు జరుగుతున్నాయని స్పష్టం చేశారు.

కూటమి మధ్య ఎలాంటి విభేదాలు లేవని, అందరం కలిసే పోటీ చేసి మెజార్టీ స్థానాలను కైవసం చేసుకుంటామని బొలిశెట్టి ధీమా వ్యక్తం చేశారు. ఎవరికి ఏ ప్రాంతంలో ఎక్కువ బలం ఉంటే అక్కడే ఆ పార్టీ పోటీ చేయాలని నిర్ణయించుకున్నట్లు తెలిపారు. ఎలాంటి పర్సంటేజీల కోసం తాము చర్చించలేదని, సీట్లు ముఖ్యం కాదని.. కూటమి గెలుపే తమ అంతిమ లక్ష్యమని తేల్చిచెప్పారు.

పార్టీ అధినేత పవన్ కల్యాణ్ కోరుకున్న విధంగానే గౌరవప్రదమైన రీతిలో సీట్ల సర్దుబాటు జరుగుతోందని ఆయన తెలిపారు. పోటీపై కూటమి పార్టీల మధ్య పూర్తి స్పష్టత ఉందని, ఉమ్మడి వ్యూహంతోనే ముందుకు వెళ్తామని చెప్పారు. త్వరలోనే కూటమి తరఫున ఉమ్మడి అభ్యర్థుల జాబితాను ప్రకటిస్తామని బొలిశెట్టి శ్రీనివాస్ వెల్లడించారు.