సమాచార హక్కు చట్టం–2005పై అవగాహన కార్యక్రమం

రేపల్లె మేజర్ న్యూస్; సమాచార హక్కు చట్టం–2005పై రైతులకు, ప్రజలకు అవగాహన కలిగి ఉండటం ఎంతో అవసరమని మండల వ్యవసాయ శాఖ అధికారి అవ్వారు మహేష్ బాబు తెలిపారు. బుధవారం రేపల్లె మండలం చాట్ట్రగడ్డ గ్రామంలో వ్యవసాయ శాఖ ఆధ్వర్యంలో సమాచార హక్కు చట్టం–2005పై అవగాహన కార్యక్రమం నిర్వహించారు. ఈ సందర్భంగా ఏవో మహేష్ బాబు మాట్లాడుతూ
ఈ చట్టంలోని వివిధ సెక్షన్లు, వాటి ప్రాధాన్యత, చట్టాన్ని ఎలా సద్వినియోగం చేసుకోవాలి అనే అంశాలను వివరించారు. ప్రతి రైతు, ప్రజలు ఈ చట్టంపై అవగాహన పెంపొందించుకోవాలని సూచించారు. అలాగే, రాజస్థాన్‌లో సమాచార హక్కు కోసం జరిగిన రైతు ఉద్యమాలు ఈ చట్టం రూపుదిద్దుకోవడంలో కీలక పాత్ర పోషించాయని వివరించారు.ఈ కార్యక్రమంలో  జిల్లా సమాచార హక్కు చట్టం సభ్యులు ఉప్పాల శ్రీకాంత్ మాట్లాడుతూ  సమాచార హక్కు చట్టం అమల్లోకి వచ్చిన తేదీ, చట్టంలోని ముఖ్యమైన అంశాలు, సమాచారాన్ని పొందేందుకు దరఖాస్తు చేసుకునే విధానం, ప్రజలు తమ హక్కులను ఎలా వినియోగించుకోవాలి అనే విషయాలపై అవగాహన కల్పించారు. రైతులు, ప్రజలు, ప్రభుత్వ అధికారులు ఈ చట్టంపై పూర్తి అవగాహన కలిగి ఉండాలని పేర్కొన్నారు.
ఈ కార్యక్రమంలో పంచాయతీ కార్యదర్శి  వెంకటేశ్వరులు, గ్రామ రెవెన్యూ అధికారి (వీఆర్వో)  రామ స్వామి, గ్రామ వ్యవసాయ అధికారి (వీఏఏ ) హిమ బిందు, వివిధ శాఖల సిబ్బంది, రైతులు, గ్రామ ప్రజలు తదితరులు
పాల్గొన్నారు.