రాత్రి వేళ పోలీసుల వాహనాల తనిఖీలు ముమ్మరం

వెంకటాపురం నూగూరు, మేజర్ న్యూస్, ములుగు జిల్లా వెంకటాపురం మండలంలో పోలీసులు బుధవారం రాత్రి విస్తృతంగా వాహన తనిఖీలు చేపట్టారు.జిల్లా ఎస్పీ ఆదేశాల మేరకు, స్థానిక ఎస్ఐ కొప్పుల తిరుపతిరావు ఆధ్వర్యంలో వెంకటాపురం - భద్రాచలం ప్రధాన రహదారిపై ఈ తనిఖీలు నిర్వహించారు. రాత్రి 7 గంటల  సమయంలో  కొనసాగిన ఈ తనిఖీల్లో ప్రధానంగా ద్విచక్ర వాహనాలను ఆపి వారి వాహన పత్రాలు, డ్రైవింగ్ లైసెన్స్,నంబర్ ప్లేట్లు పరిశీలించారు. అదేవిధంగా డ్రంక్ అండ్ డ్రైవ్ కేసులను గుర్తించేందుకు బ్రీత్ ఎనలైజర్ తో పరీక్షలు నిర్వహించారు.
హెల్మెట్ లేకుండా ప్రయాణిస్తున్న వారికి, ట్రిపుల్ రైడింగ్ చేస్తున్న వారికి కౌన్సెలింగ్ ఇచ్చి హెచ్చరించారు.మద్యం సేవించి వాహనాలు నడుపుతున్న వారిపై కేసులు నమోదు చేసి జరిమానాలు విధిస్తున్నట్లు పోలీసులు తెలిపారు.గంజాయి, అక్రమ మద్యం రవాణాను అరికట్టడం, దొంగతనాలు,చైన్ స్నాచింగ్ వంటి నేరాలను నియంత్రించడంలో భాగంగానే ఈ తనిఖీలు చేపడుతున్నామని, ప్రజలు పోలీసులకు సహకరించాలని, తప్పనిసరిగా ట్రాఫిక్ నిబంధనలు పాటించాలని ఎస్ఐ విజ్ఞప్తి చేశారు.తనిఖీలలో పోలీసు సిబ్బంది లకావత్ బాల,రాము తదితరులు ఉన్నారు.

రిపోర్టర్, చక్రధర్, వెంకటాపూర్ ,ములుగు జిల్లా