ప్రేమ పేరుతో వేధింపులు.. - పదో తరగతి బాలిక బలవన్మరణం

సూర్య, వేములవాడ:ప్రేమ పేరుతో వేధింపులకు గురై ఓ పదో తరగతి బాలిక బలవన్మరణానికి పాల్పడిన ఘటన రాజన్న సిరిసిల్ల జిల్లా చందుర్తి మండలం లింగంపేటలో తీవ్ర విషాదాన్ని నింపింది. చదువుకుని ఉన్నత స్థాయికి చేరుకోవాల్సిన బాలిక వేధింపులు తాళలేక తనువు చాలించిందన్న వార్త స్థానికంగా కలకలం రేపింది.
ఫోన్ కాల్స్‌, సోషల్ మీడియా సందేశాలతో వేధింపులువివరాల ప్రకారం.. బాలికను ఓ యువకుడు ప్రేమ పేరుతో ఫోన్ కాల్స్‌, ఇన్‌స్టాగ్రామ్‌లో వరుస సందేశాల ద్వారా వేధించినట్లు ఆరోపణలు ఉన్నాయి. ఈ విషయమై బాలిక కుటుంబ సభ్యులు ముందుగానే యువకుడిని హెచ్చరించినప్పటికీ వేధింపులు ఆగలేదని సమాచారం. ఈ పరిణామాల నేపథ్యంలో బాలిక బలవన్మరణానికి పాల్పడినట్లు తెలుస్తోంది.

*కేసు నమోదు.. పోలీసుల దర్యాప్తు* 
బాలిక మృతిపై పోలీసులు కేసు నమోదు చేసి దర్యాప్తు చేపట్టారు. ఘటనకు సంబంధించిన పూర్తి వివరాలను సేకరిస్తూ, వేధింపుల ఆరోపణలపై విచారణ జరుపుతున్నారు. నిందితుడిపై చట్ట ప్రకారం చర్యలు తీసుకుంటామని సీఐ రవీందర్ స్పష్టం చేసినట్లు సమాచారం.
బాలిక మృతితో కుటుంబ సభ్యులు తీవ్ర విషాదంలో మునిగిపోయారు. విద్యార్థినుల భద్రత, సోషల్ మీడియా ద్వారా జరుగుతున్న వేధింపులపై మరోసారి ఆందోళన వ్యక్తమవుతోంది. పోలీసుల దర్యాప్తులో వెల్లడయ్యే వివరాల ఆధారంగా ఘటనకు సంబంధించిన పూర్తి వాస్తవాలు వెలుగులోకి రానున్నాయి.