ప్రజాస్వామ్య పరిరక్షణకు INDIA కూటమి పిలుపు
సూర్య కరీంనగర్ ప్రతినిధి: ప్రజాస్వామ్య పరిరక్షణ వారంలో భాగంగా కేంద్ర ఎన్నికల సంఘం పనితీరుపై తమ అభ్యంతరాలను వ్యక్తం చేస్తూ, ప్రధాన ఎన్నికల కమిషనర్‌ (సీఈసీ) జ్ఞానేష్‌కుమార్‌ను పదవి నుంచి తొలగించాలని డిమాండ్‌ చేస్తూ INDIA కూటమి నాయకులు కరీంనగర్‌లో సంయుక్త సమావేశం నిర్వహించారు. ఏఐసీసీ పిలుపు మేరకు జిల్లా కాంగ్రెస్‌, కార్పొరేషన్‌ కాంగ్రెస్‌ కమిటీల ఆధ్వర్యంలో ఆర్‌అండ్‌బీ అతిథి గృహంలో సోమవారం సమావేశం జరిగింది.
చొప్పదండి ఎమ్మెల్యే, జిల్లా కాంగ్రెస్‌ అధ్యక్షుడు డాక్టర్‌ మేడిపల్లి సత్యం అధ్యక్షతన జరిగిన సమావేశంలో కార్పొరేషన్‌ కాంగ్రెస్‌ అధ్యక్షుడు వైద్యుల అంజన్‌కుమార్‌, జిల్లా గ్రంథాలయ సంస్థ చైర్మన్‌ సత్తు మల్లేశం, సీపీఐ, సీపీఎం, ఆమ్‌ ఆద్మీ పార్టీ, ఆల్‌ ఇండియా ఫార్వర్డ్‌ బ్లాక్‌, తెలంగాణ జన సమితి, సమాజ్‌వాదీ పార్టీ తదితర కూటమి పక్షాల నాయకులు పాల్గొన్నారు.ఈ సందర్భంగా మేడిపల్లి సత్యం మాట్లాడుతూ.. ఎన్నికల సంఘం పనితీరు, ఓటర్ల జాబితాకు సంబంధించిన అంశాలపై కాంగ్రెస్‌ అగ్రనేత రాహుల్‌గాంధీ గత కొంతకాలంగా ప్రశ్నలు లేవనెత్తుతున్నారని తెలిపారు. ఎన్నికల సంఘం స్వయం ప్రతిపత్తి కలిగిన రాజ్యాంగబద్ధ సంస్థగా ప్రజల విశ్వాసాన్ని కాపాడాల్సిన బాధ్యత ఉందన్నారు. ప్రస్తుత ఎన్నికల సంఘం వ్యవహారశైలిపై తమకు అభ్యంతరాలు ఉన్నాయని, ఈ అంశంపై ప్రజాస్వామ్య పరిరక్షణ వారంలో భాగంగా నిరసన కార్యక్రమాలు చేపడుతున్నట్లు తెలిపారు.ఈ నేపథ్యంలో మంగళవారం ఉదయం 10.30 గంటలకు ఇందిరాగాంధీ చౌరస్తా నుంచి కరీంనగర్ కలెక్టరేట్‌ వరకు భారీ మార్చ్‌ నిర్వహించనున్నట్లు సత్యం వెల్లడించారు. అనంతరం కలెక్టర్‌కు వినతిపత్రం అందజేస్తామని తెలిపారు. ఈ కార్యక్రమంలో వివిధ రాజకీయ, ప్రజా సంఘాల నాయకులు, కార్యకర్తలు పాల్గొనాలని ఆయన పిలుపునిచ్చారు.సమావేశంలో సీపీఐ జిల్లా కార్యదర్శి పంజాల శ్రీనివాస్, సీపీఎం జిల్లా కార్యదర్శి వాసుదేవరెడ్డి, ఆల్‌ ఇండియా ఫార్వర్డ్‌ బ్లాక్‌ ఉమ్మడి కరీంనగర్ జిల్లా అధ్యక్షుడు తేజదీప్‌రెడ్డి, సీపీఐ ఎంఎల్‌ (మాస్‌లైన్‌) జిల్లా కార్యదర్శి జిన్నం ప్రసాద్‌, సీపీఐ జిల్లా కౌన్సిల్‌ సభ్యుడు పైడిపల్లి రాజు, ఏఐఎస్‌ఎఫ్‌ రాష్ట్ర అధ్యక్షుడు మణికంఠరెడ్డి, జిల్లా అధ్యక్షుడు శ్రీనివాస్‌నాయక్‌, కాంగ్రెస్‌ అనుబంధ సంఘాల అధ్యక్షుడు కొరివి అరుణ్‌కుమార్‌, జిల్లా మహిళా కాంగ్రెస్‌ అధ్యక్షురాలు కర్ర సత్యప్రసన్నారెడ్డి, ముత్యం శంకర్‌, ఎస్‌టీ సెల్‌ అధ్యక్షుడు శ్రావణ్‌నాయక్‌, ఏఐఎస్‌ఎఫ్‌ జిల్లా వర్కింగ్‌ ప్రెసిడెంట్‌ హేమంత్‌, సీపీఐ నగర నాయకుడు అంజన్న తదితరులు పాల్గొన్నారు.
