ప్రజా సేవకే నా తొలి ప్రాధాన్యత

 సూర్య కరీంనగర్ :ఇండియన్ రెడ్ క్రాస్ సొసైటీ కరీంనగర్ జిల్లా చైర్మన్‌గా ఎన్నికైన టీఎన్జీవోల సంఘం జిల్లా కార్యదర్శి సంగెం లక్ష్మణ్‌రావును కరీంనగర్ అఖిల బ్రాహ్మణ సేవా సంఘం ఆధ్వర్యంలో ఘనంగా సన్మానించారు. ప్రజాసేవలో ఆయన అందిస్తున్న సేవలను కొనియాడుతూ సంఘం ప్రతినిధులు, సభ్యులు పుష్పగుచ్ఛాలు అందించి శాలువాతో సత్కరించారు.ఈ సందర్భంగా చైర్మన్ సంగెం లక్ష్మణ్‌రావు మాట్లాడుతూ, రెడ్ క్రాస్ సొసైటీ చైర్మన్‌గా ఎన్నిక కావడం ఎంతో సంతోషంగా ఉందని, తన ఎన్నికకు సహకరించిన ప్రతి ఒక్కరికీ హృదయపూర్వక కృతజ్ఞతలు తెలిపారు. రెడ్ క్రాస్ సొసైటీ ద్వారా అందించే సేవలు సమాజంలోని అన్ని వర్గాల ప్రజలకు అందుబాటులో ఉండేలా కృషి చేస్తానని పేర్కొన్నారు. ముఖ్యంగా ఆపదలో ఉన్నవారికి, పేదలకు, అవసరమైన వారికి సేవలందించడమే తన ప్రధాన లక్ష్యమని తెలిపారు.అఖిల బ్రాహ్మణ సేవా సంఘం తనను ఘనంగా సన్మానించడం ఆనందంగా ఉందని, తన సంఘానికి, సమాజానికి మరింత సేవ చేయాల్సిన బాధ్యత తనపై ఉందని ఆయన పేర్కొన్నారు. 

ప్రజల ఆదరాభిమానాలతో సేవా కార్యక్రమాలను మరింత విస్తృతంగా కొనసాగిస్తానని తెలిపారు.ఈ కార్యక్రమంలో అఖిల బ్రాహ్మణ సేవా సంఘం అధ్యక్షులు జి.వి. రంగారావు, ప్రధాన కార్యదర్శి పురం ప్రేమ్‌చందర్‌రావు, నాయకులు పెండ్యాల ఆనంద్,  శ్రీనివాసరావు, సంజీవరావు,   చంద్రమౌళి, రామారావు .టీఎన్జీవోల సంఘం కరీంనగర్ టౌన్ అధ్యక్షులు మారుపాక రాజేష్ భరద్వాజ్, ఎర్రబాటి రంగారావు, శశికాంత్, సీహెచ్ కృష్ణమోహన్, శ్రీచరణ్, రవితేజ, పురాణం రాము, విజయకుమార్, వెంకటేశ్వరరావు, గోపాలరావు, గజవెల్లి రాజేంద్రప్రసాద్, గర్శకుర్తి శ్రీనివాసరావు, శ్రీధర్‌రావు తదితరులు హాజరై లక్ష్మణ్‌రావుకు అభినందనలు తెలిపారు.సంఘం ప్రతినిధులు, నాయకులు, సభ్యులు పెద్ద సంఖ్యలో పాల్గొనడంతో సన్మాన కార్యక్రమం విజయవంతంగా ముగిసింది.