ప్రభుత్వ ఆస్పత్రుల్లోనే ప్రసవాలు జరిగేలా చూడాలి

– పెన్ పహాడ్ పి.హెచ్.సి.లో సమీక్షా సమావేశం
– ఆశా కార్యకర్తలకు జిల్లా అధికారుల దిశానిర్దేశం

పెన్ పహాడ్, మేజర్ న్యూస్

గర్భిణుల వివరాల నమోదు 100 శాతం పూర్తి కావాలని, కాన్పులన్నీ ప్రభుత్వ ఆస్పత్రుల్లోనే జరిగేలా ఆశా కార్యకర్తలు అవగాహన కల్పించాలని జిల్లా వైద్య ఆరోగ్య శాఖ అధికారులు సూచించారు. మంగళవారం మండల కేంద్రంలోని ప్రాథమిక ఆరోగ్య కేంద్రంలో  'ఆశా డే' సమావేశాన్ని నిర్వహించారు. ఈ కార్యక్రమానికి సూర్యాపేట జిల్లా వైద్య ఆరోగ్య శాఖ కార్యాలయం నుండి స్టాటిస్టికల్ ఆఫీసర్ బాసిత్, అసిస్టెంట్ స్టాటిస్టికల్ ఆఫీసర్ మత్స్యగిరి, పబ్లిక్ హెల్త్ నర్సింగ్ ఆఫీసర్ శిరోమణి ముఖ్య అతిథులుగా హాజరై మాట్లాడారు.
ఈ సందర్భంగా అధికారులు మాట్లాడుతూ.. క్షేత్రస్థాయిలో ఆశా కార్యకర్తలు పూర్తి బాధ్యతతో ప్రజలకు మెరుగైన ఆరోగ్య సేవలు అందించాలన్నారు. ఆన్‌లైన్ నివేదికలను, రికార్డులను ఎప్పటికప్పుడు త్వరితగతిన నవీకరించాలని ఆదేశించారు. వైద్యారోగ్య శాఖ అజెండా ప్రకారం.. స్వచ్ఛ భారత్ స్పెషల్ డ్రైవ్, ఇంటింటి జ్వరాల సర్వే, గర్భిణులు మరియు పిల్లల ఆరోగ్య సంరక్షణ, వ్యాధి నిరోధక టీకాలు, హెచ్‌పీవీ  వ్యాక్సినేషన్ డ్రైవ్, టీబీ, డెంగ్యూ, మలేరియా, ఎన్సీడీ స్క్రీనింగ్ తదితర ఆరోగ్య కార్యక్రమాల అమలుపై సుదీర్ఘంగా సమీక్షించారు.
ఈ కార్యక్రమంలో పి.హెచ్.సి వైద్యాధికారి డాక్టర్ రాజేష్, కమ్యూనిటీ హెల్త్ ఆఫీసర్ సైదమ్మ, పబ్లిక్ హెల్త్ నర్సింగ్ ఆఫీసర్ పద్మ, ఆరోగ్య విస్తరణ అధికారి ప్రభాకర్, ఎం.ఎల్.హెచ్.పి హెల్త్ అసిస్టెంట్లు,ఆశా కార్యకర్తలు తదితరులు పాల్గొన్నారు.