ఓల్డ్ గ్యాస్ మండిలో ఘనంగా దుర్గామాత అన్నదాన కార్యక్రమం. పాల్గొన్న టీజీబీసీఎల్ డిపో మేనేజర్ గండి సురేందర్!

సూర్య సిటీ & కల్చరల్ డెస్క్, సికింద్రాబాద్: దేవీ శరన్నవరాత్రి ఉత్సవాలను పురస్కరించుకుని ఓల్డ్ గ్యాస్ మండి ఫ్రెండ్స్ అసోసియేషన్ ఆధ్వర్యంలో కొలువుదీరిన దుర్గామాత మండపం వద్ద ఆదివారం మహా అన్నదాన కార్యక్రమాన్ని అత్యంత భక్తిశ్రద్ధలతో ఘనంగా నిర్వహించారు. ఈ కార్యక్రమానికి ముఖ్య అతిథిగా టీజీబీసీఎల్, ఐఎంఎఫ్‌ఎల్ డిపో మేనేజర్ గండి సురేందర్ హాజరై అమ్మవారికి ప్రత్యేక పూజలు, హారతులు సమర్పించి దర్శించుకున్నారు.

అన్నదానం మహత్తర సేవ – గండి సురేందర్:
ఈ సందర్భంగా గండి సురేందర్ మాట్లాడుతూ.. ఓల్డ్ గ్యాస్ మండి ఫ్రెండ్స్ అసోసియేషన్ సభ్యులు ప్రతి సంవత్సరం జగన్మాత విగ్రహాన్ని ప్రతిష్ఠించి, తొమ్మిది రోజుల పాటు భక్తిశ్రద్ధలతో ఉత్సవాలు నిర్వహించడం ఎంతో అభినందనీయమని కొనియాడారు. కేవలం పూజలకే పరిమితం కాకుండా, ప్రతిరోజూ 800 మందికి పైగా భక్తులకు స్వచ్ఛందంగా అన్నదాన ప్రసాద వితరణ చేయడం వారి సేవా నిరతికి నిదర్శనమని ప్రశంసించారు. ఆపన్నులకు, భక్తులకు అన్నం పెట్టడం కంటే మిన్నయైన సేవ మరొకటి లేదని, ఇలాంటి మహత్తర ఆధ్యాత్మిక, సేవా కార్యక్రమంలో తాను కూడా భాగస్వామి కావడం ఎంతో సంతోషాన్ని, సంతృప్తిని ఇచ్చిందని పేర్కొన్నారు.

ఈ కార్యక్రమంలో రాంగోపాల్‌పేట్ కాంగ్రెస్ పార్టీ డివిజన్ అధ్యక్షుడు త్రికాల మనోజ్ కుమార్, ప్రముఖులు చక్రపాణి, టింకు, శ్రవణ్ తదితర అసోసియేషన్ ప్రతినిధులు, కాలనీవాసులు మరియు పెద్ద సంఖ్యలో భక్తులు పాల్గొని తీర్థప్రసాదాలు స్వీకరించారు.