మంచిర్యాలలో ఓ ప్రైవేట్ ఆసుపత్రిలో గర్భిణీ మృతి.. నిర్లక్ష్యమే కారణమంటున్న కుటుంబ సభ్యులు

సూర్య, మంచిర్యాల జిల్లా ప్రతినిధి :

 మంచిర్యాల పట్టణంలోని ఓ ప్రైవేట్ ఆసుపత్రిలో చోటుచేసుకున్న ఘటన స్థానికంగా కలకలం రేపింది. చికిత్స కోసం వచ్చిన గర్భిణీ మహిళ మృతి చెందడంతో కుటుంబ సభ్యులు ఆసుపత్రి ఎదుట ఆందోళనకు దిగారు.

బాధితురాలు గుడిపేట గ్రామానికి చెందిన మహిళగా తెలుస్తోంది. గర్భంలో శిశువు మృతి చెందినట్లు వైద్యులకు ముందే తెలిసినప్పటికీ, అత్యవసరంగా ఆపరేషన్ చేయకుండా నిర్లక్ష్యంగా వ్యవహరించడం వల్లే తమ కుటుంబ సభ్యురాలు ప్రాణం కోల్పోయిందని బంధువులు ఆరోపిస్తున్నారు.

సమాచారం అందుకున్న కుటుంబ సభ్యులు పెద్ద ఎత్తున ఆసుపత్రికి చేరుకోవడంతో అక్కడ ఉద్రిక్త వాతావరణం నెలకొంది. బాధిత కుటుంబానికి న్యాయం చేయాలని వారు డిమాండ్ చేస్తున్నారు.

ఈ ఘటనపై ఆసుపత్రి వర్గాల నుండి ఇంకా ఎటువంటి ప్రకటన రాలేదు. పోలీసులకు ఫిర్యాదు చేస్తామని కుటుంబ సభ్యులు తెలిపారు. పూర్తి వివరాలు తెలియాల్సి ఉంది.