మనీలాండరింగ్ కేసులో కాంగ్రెస్ ఎమ్మెల్యే అరికెపూడి గాంధీకి ఈడీ సమన్లు.. సెప్టెంబర్ 27న విచారణకు హాజరుకావాలని ఆదేశం!

సూర్య తెలంగాణ డెస్క్: రాష్ట్రంలో సంచలనం సృష్టించిన సాహితి ఇన్‌ఫ్రాటెక్ వెంచర్స్ ఇండియా ప్రైవేట్ లిమిటెడ్ మనీలాండరింగ్ కుంభకోణానికి సంబంధించి ఎన్‌ఫోర్స్‌మెంట్ డైరెక్టరేట్ దర్యాప్తును మరింత వేగవంతం చేసింది. ఈ కేసుకు సంబంధించి శేరిలింగంపల్లి ఎమ్మెల్యే అరికెపూడి గాంధీకి ఈడీ అధికారులు తాజాగా సమన్లు జారీ చేశారు. సాహితీ ఇన్‌ఫ్రా సంస్థ నుంచి ఎమ్మెల్యే బ్యాంకు ఖాతాల ద్వారా సుమారు రూ. 2.1 కోట్ల నిధులు మళ్లించబడినట్లు దర్యాప్తులో గుర్తించిన అధికారులు, ఈ లావాదేవీలపై వివరణ ఇచ్చేందుకు ఈ నెల 27వ తేదీన విచారణకు వ్యక్తిగతంగా హాజరుకావాలని స్పష్టం చేశారు.  

తెలంగాణ పోలీసులు నమోదు చేసిన ఎఫ్‌ఐఆర్‌ల ఆధారంగా మనీలాండరింగ్ కోణంలో దర్యాప్తు చేపట్టిన ఈడీ, ప్రారంభంలో రూ. 248 కోట్లుగా ఉన్న ఈ మోసం విలువ తదుపరి విచారణలో ఏకంగా రూ. 842 కోట్లకు చేరినట్లు అంచనా వేసింది. ప్రీ-లాంచ్ ఆఫర్ల పేరుతో అమాయక కొనుగోలుదారుల నుంచి భారీగా నిధులు వసూలు చేసి, ఆపై ప్రాజెక్టులు పూర్తి చేయకుండా మోసం చేశారనే తీవ్ర ఆరోపణలు ఉన్నాయి. సేకరించిన నిధులను సంస్థ ఎండీ బి. లక్ష్మీనారాయణ మరియు ఇతర మాజీ డైరెక్టర్లు బినామీ పేర్లతో ఆస్తుల కొనుగోళ్లకు, సొంత ఖాతాలకు మళ్లించినట్లు అధికారులు గుర్తించారు. ఈ కేసుకు సంబంధించి ఇప్పటికే ఎండీ లక్ష్మీనారాయణను 2024 సెప్టెంబర్‌లో అరెస్ట్ చేయగా, 56 బ్యాంకు ఖాతాలను ఫ్రీజ్ చేయడంతో పాటు రూ. 173 కోట్లకు పైగా విలువైన ఆస్తులను ఈడీ అటాచ్ చేసింది. కాగా, రూ. 2.1 కోట్ల లావాదేవీల స్వభావం, దాని వెనుక ఉన్న ఉద్దేశంపై ఎమ్మెల్యే అరికెపూడి గాంధీని ప్రశ్నించనున్న నేపథ్యంలో ఈ విచారణ ప్రాధాన్యత సంతరించుకుంది.