కరోనా కంటే ఎల్ నినో ప్రభావం ప్రమాదకరం

పాల్మాకుల్ గ్రామ సర్పంచ్ కోటేశ్వర్ గౌడ్ 

శంషాబాద్ : కరోనా కంటే ఎల్ నినో ప్రభావం అత్యంత ప్రమాదకరమని పాల్మాకుల్ గ్రామ సర్పంచ్ కటికూరి కోటేశ్వర్ గౌడ్ అన్నారు.శంషాబాద్ మండల పరిధిలోని పాల్మాకుల్ గ్రామంలో సర్పంచ్ అధ్యక్షతన గ్రామసభ నిర్వహించారు. ఎల్ నినో ప్రభావంతో నీటి వినియోగం, నీటి ఎద్దడి లేని పంటల సాగుపై రైతులకు అవగాహన కల్పించారు.
ఈ సందర్భంగా సర్పంచ్ కోటేశ్వర్ గౌడ్ మాట్లాడుతూ.. ఈ సంవత్సరం సూపర్ ఎల్ నినో వల్ల దేశవ్యాప్తంగా, రాష్ట్రవ్యాప్తంగా ప్రజలు తీవ్ర ఇబ్బందులు పడే అవకాశం ఉందన్నారు. అందులో భాగంగా పాల్మాకుల్ గ్రామంలో ప్రతి ఒక్కరూ నీటిని పొదుపుగా వాడుకోవాలని, బాధ్యతగా చర్యలు తీసుకోవాలని సూచించారు. ఇలాంటి విపత్కర సమయంలో అందరూ కలిసికట్టుగా విపత్తును ఎదుర్కోవాలని పిలుపునిచ్చారు. రైతులు ప్రభుత్వ వ్యవసాయాధికారుల సూచనలు పాటించాలని, వరి పంట సాగును తగ్గించి ఆరుతడి పంటలు సాగు చేయాలని సూచించారు. ప్రతి ఒక్కరూ జాబ్ కార్డులు తీసుకుని ఉపాధి అవకాశాలు పొందాలని, గ్రామంలో నీటిని వృథా చేయకుండా పొదుపుగా వినియోగించాలని ఆయన కోరారు.