అప్రకటిత విద్యుత్ కోతలతో రైతుల అవస్థలు.. మర్పల్లిని కరువు మండలంగా ప్రకటించాలి: మండల పార్టీ అధ్యక్షుడు శ్రీకాంత్ రెడ్డి

మర్పల్లి, మేజర్ న్యూస్: అప్రకటిత విద్యుత్ కోతలతో రైతులు తీవ్ర ఇబ్బందులు ఎదుర్కొంటున్నారని, ప్రభుత్వం తక్షణమే స్పందించి వ్యవసాయానికి నాణ్యమైన విద్యుత్‌ను నిరంతరాయంగా సరఫరా చేయాలని టీఆర్ఎస్ మర్పల్లి మండల అధ్యక్షుడు శ్రీకాంత్ రెడ్డి డిమాండ్ చేశారు. శుక్రవారం మర్పల్లి మండల కేంద్రంలో నిర్వహించిన సమావేశంలో ఆయన మాట్లాడుతూ కాంగ్రెస్ ప్రభుత్వ తీరుపై విమర్శలు గుప్పించారు. టీఆర్ఎస్ ప్రభుత్వ హయాంలో మాజీ ముఖ్యమంత్రి కేసీఆర్ నాయకత్వంలో వ్యవసాయానికి 24 గంటల పాటు నాణ్యమైన విద్యుత్ అందించామని గుర్తుచేశారు. ప్రస్తుత కాంగ్రెస్ ప్రభుత్వం ఎన్నికల సమయంలో ఇచ్చిన హామీలను అమలు చేయడంలో విఫలమైందని, రైతుబంధు, రైతు భరోసా పథకాల అమలులో కోతలు విధించడంతో పాటు విద్యుత్ కోతలతో రైతులను ఇబ్బందులకు గురిచేస్తోందని ఆరోపించారు. వర్షాభావ పరిస్థితులతో మర్పల్లి మండల రైతులు కరువు కోరల్లో చిక్కుకున్నారని ఆవేదన వ్యక్తం చేశారు. ప్రభుత్వం మర్పల్లి మండలాన్ని కరువు మండలంగా ప్రకటించి రైతులను ఆదుకోవాలని డిమాండ్ చేశారు. అదేవిధంగా మండల కేంద్రంలో నిర్మించిన 112 డబుల్ బెడ్రూం ఇళ్లు నిరుపయోగంగా పడి ఉన్నాయని, వాటికి అవసరమైన మరమ్మతులు చేపట్టి అర్హులైన నిరుపేదలకు కేటాయించాలని కోరారు. ఈ సమావేశంలో నాయకులు శ్రీనివాస్, అశోక్, మధు, మోహన్ రెడ్డితో పాటు వివిధ గ్రామాలకు చెందిన నాయకులు, కార్యకర్తలు పాల్గొన్నారు.