హైవే పనుల్లో నాణ్యతకు గండి

తుపుపట్టి  స్టీల్‌తో కల్వర్ట్‌.. బండరాళ్లతో రోడ్డు నిర్మాణం
*కోట్లాది ప్రజాధనంతో పనులు.. 
*ప్రమాణాలు పక్కనపెట్టి ఇష్టారాజ్యంగా నిర్మాణం చేస్తున్నారంటూ ప్రజల ఆగ్రహం
*పోనేకల్ నుంచి కొరివి హైవే 
ఖమ్మం రూరల్ సూర్య మేజర్ న్యూస్ : కోట్లాది రూపాయలతో నిర్మిస్తున్న హైవే పనుల్లో నాణ్యత ప్రమాణాలపై తీవ్ర ఆరోపణలు వెల్లువెత్తుతున్నాయి. పోనేకల్‌ నుంచి కొరివి వైపు చేపడుతున్న కల్వర్ట్‌, బ్రిడ్జి నిర్మాణ పనుల్లో తుప్పుపట్టిన ఇనుప స్టీల్‌ను వినియోగిస్తున్నారని, స్టీల్‌ స్పేసింగ్‌, ఎత్తు, వెడల్పు తదితర నిర్మాణ ప్రమాణాల్లోనూ నిబంధనలు పాటించడం లేదని స్థానికులు ఆరోపిస్తున్నారు. ప్రజాధనంతో చేపడుతున్న ప్రతిష్ఠాత్మక హైవే పనుల్లో ఇంత నిర్లక్ష్యమా అంటూ ప్రజలు తీవ్ర ఆగ్రహం వ్యక్తం చేస్తున్నారు.
గ్రావెల్‌కు బదులు బండరాళ్లు.. పైన మట్టి!
హైవే రోడ్డు నిర్మాణంలో నాణ్యమైన గ్రావెల్‌ ఉపయోగించాల్సి ఉండగా, బండరాళ్లు వేసి వాటిపై మట్టిని నింపుతూ రోలర్‌తో పైభాగాన్ని లెవెల్‌ చేస్తున్నారని స్థానికులు ఆరోపిస్తున్నారు. ఇలా చేస్తే భవిష్యత్‌లో రోడ్డు నాణ్యతపై ప్రభావం పడే ప్రమాదం ఉందని వారు ఆందోళన వ్యక్తం చేస్తున్నారు. కోట్ల రూపాయల ప్రాజెక్టును పల్లెటూరు రోడ్డు మాదిరిగా నామమాత్రంగా నిర్మిస్తున్నారంటూ మండిపడుతున్నారు.
రైతులకు పరిహారం ఏదీ?
అరేకోడు సర్వే నంబర్‌ 80లో రైతు ఉపుగండ్ల వెంకటేశ్వర్లుకు పైప్‌లైన్‌, పంప్‌హౌస్‌, మామిడి చెట్లకు సంబంధించిన నష్టపరిహారం ఇంకా అందలేదని రైతు ఆవేదన వ్యక్తం చేస్తున్నారు. పరిహారం చెల్లింపులు పూర్తికాకముందే రోడ్డు పనులు చేపట్టడంపై రైతులు అభ్యంతరం వ్యక్తం చేస్తున్నట్లు తెలిపారు. పలువురు రైతులకు కూడా నష్టపరిహారం బకాయిలు ఉన్నాయని వారు పేర్కొంటున్నారు.
అధికారులు వెంటనే రంగంలోకి దిగాలి
హైవే పనులపై వస్తున్న ఆరోపణల నేపథ్యంలో అధికారులు తక్షణమే పనులను నిలిపివేసి క్షేత్రస్థాయిలో సమగ్ర తనిఖీలు నిర్వహించాలని ప్రజలు డిమాండ్ చేస్తున్నారు. కల్వర్ట్‌, బ్రిడ్జి నిర్మాణంలో ఉపయోగిస్తున్న స్టీల్‌ నాణ్యత, స్పేసింగ్‌, కొలతలు, రోడ్డు నిర్మాణంలో ఉపయోగిస్తున్న మెటీరియల్‌ను నిపుణులతో పరీక్షించాలని కోరుతున్నారు. నిబంధనలు ఉల్లంఘించినట్లు తేలితే సంబంధిత కాంట్రాక్టర్‌పై చర్యలు తీసుకోవడంతో పాటు బిల్లుల చెల్లింపులను నిలిపివేయాలని ప్రజలు డిమాండ్ చేస్తున్నారు.
“కోట్ల రూపాయల ప్రజాధనం ఖర్చు చేస్తున్న హైవేను నాణ్యత లేకుండా నిర్మిస్తే భవిష్యత్‌లో ప్రజలే మూల్యం చెల్లించాల్సి వస్తుంది. ఇప్పటికైనా అధికారులు మేల్కొని పనులను తనిఖీ చేయాలి” అని స్థానికులు కోరుతున్నారు.