ఏకపక్షంగా వ్యవహరిస్తున్న ఎస్సై పై చర్యలు తీసుకోవాలి

ఏకపక్షంగా వ్యవహరిస్తున్న శంకర్ పల్లి ఎస్సై శ్రీశైలంపై చర్యలు తీసుకోవాలని  ఆలంఖాన్ గూడ గ్రామస్తుడు మహేందర్  పేర్కొన్నారు. బుధవారం రోజున గ్రామస్తులతో కలిసి  శంకర్పల్లి లో విలేకరులతో మాట్లాడుతూ…  మంగళవారం రాత్రి భోజిరెడ్డి ఇంటి ముందుగల అరుగుపై  తాను భోజిరెడ్డితో మాట్లాడుతుండగా, గ్రామానికి చెందిన కొందరు వ్యక్తులు వచ్చి తమపై దాడి చేశారని  తెలిపారు. రాత్రి శంకర్పల్లి పోలీస్ స్టేషన్ లో  దాడి చేసిన వారిపై ఫిర్యాదు చేశామనీ వాపోయారు. ఇచ్చిన ఫిర్యాదు గురించి తెలుసుకునేందుకు బుధవారం ఉదయం శంకర్పల్లి పోలీస్ స్టేషన్ కు తాను భోజ రెడ్డితో కలిసి రాగ, ఎస్సై శ్రీశైలం భోజిరెడ్డిని అకారణంగా ఈడ్చుకుంటూ వెళ్లి సెల్లో వేశారని తెలిపారు. గ్రామానికి వచ్చి ఎలాంటి విచారణ చేయకుండా, సెల్లో  ఎలా వేశారని ప్రశ్నించారు.  ఉన్నతాధికారులు జరిగిన సంఘటనపై  తగిన విచారణ జరిపించి  న్యాయం చేయాలని  ఆయన కోరారు. పలుకుబడి కలిగిన వ్యక్తులకు ఆయన అండగా ఉంటారని, సామాన్య ప్రజలను పట్టించుకోకుండా, న్యాయం కోసం పోరాటం చేస్తున్న వ్యక్తులను ఎస్సై పట్టించుకోరని ఆయన తెలిపారు.

- మాడిశెట్టి రాజ శేఖర్, మేజర్ న్యూస్, శంకర్ పల్లి.