ఏఐ మాయతో ఎంపీ చామల గొంతు మార్పు

‘
డిగ్‌ టీవీ పారడి’పై చర్యలు తీసుకోవాలని ఎస్పీకి కాంగ్రెస్‌ నేతల ఫిర్యాదు

యాదాద్రి :ఏఐ సాంకేతికతను అడ్డుపెట్టుకుని భువనగిరి ఎంపీ చామల కిరణ్‌కుమార్‌రెడ్డి గొంతును మార్ఫింగ్‌ చేసి, సీఎం రేవంత్‌రెడ్డి కుటుంబంపై అనుచిత వ్యాఖ్యలు చేసినట్లుగా తప్పుడు వీడియోను రూపొందించి సోషల్‌ మీడియాలో వైరల్‌ చేస్తున్నారని కాంగ్రెస్‌ నాయకులు ఆరోపించారు. ఈ మేరకు ‘డిగ్‌ టీవీ పారడి’ చానెల్‌పై గురువారం జిల్లా ఎస్పీకి ఫిర్యాదు చేశారు.ఎంపీ మాట్లాడినట్లుగా నమ్మించేలా వాయిస్‌ను మార్చి తప్పుడు ప్రచారం చేయడం వెనుక ఉన్న వారిని గుర్తించాలని కోరారు. ప్రజలను తప్పుదోవ పట్టించేలా సోషల్‌ మీడియాలో అసత్య వీడియోలను వైరల్‌ చేస్తున్న వారిపై చట్టపరమైన చర్యలు తీసుకోవాలని ఎస్పీని కోరారు. ఏఐ సాంకేతికతను దుర్వినియోగం చేస్తూ వ్యక్తుల ప్రతిష్ఠకు భంగం కలిగించేలా కంటెంట్‌ రూపొందించడాన్ని అరికట్టాలని పేర్కొన్నారు. ఫిర్యాదు కార్యక్రమంలో భువనగిరి మున్సిపల్‌ ఛైర్‌పర్సన్‌ తంగేళ్లపల్లి శ్రీవాణి రవికుమార్, పీసీసీ ప్రధాన కార్యదర్శి పొత్నాక్‌ ప్రమోద్‌కుమార్, పీసీసీ డెలిగేట్‌ సభ్యుడు తంగేళ్లపల్లి రవికుమార్, కౌన్సిలర్లు కుక్కదువ్వు సోమయ్య, బెండెలాల్‌ రాజ్, షఫీక్‌ అహ్మద్, కోఆప్షన్‌ సభ్యుడు పల్లెర్ల యాదగిరి, సేవాదళ్‌ రాష్ట్ర ప్రధాన కార్యదర్శి పిట్టల బాల్రాజ్, మాజీ జిల్లా అధ్యక్షుడు సామల రవీందర్, కాంగ్రెస్‌ నాయకులు మహమ్మద్‌ అతహర్, రాము, మచ్చ రాజు యాదవ్, శరత్, నేహాల్‌ తదితరులు పాల్గొన్నారు.