బ్యారేజీల పునరుద్ధరణకు ప్రభుత్వం సిద్ధం నవంబర్లో పనులు ప్రారంభిస్తాం: మంత్రి ఉత్తమ్ కుమార్ రెడ్డి
హైదరాబాద్, సూర్య ప్రధాన ప్రతినిధి : కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీల పునరుద్ధరణకు తెలంగాణ ప్రభుత్వం చర్యలు వేగవంతం చేసింది. మూడు బ్యారేజీల పునరుద్ధరణకు సంబంధించిన డిజైన్లను ఖరారు చేసినట్లు నీటిపారుదల శాఖ మంత్రి ఉత్తమ్ కుమార్ రెడ్డి తెలిపారు.
అక్టోబర్ 5న కేంద్ర జల సంఘం కమిటీ ముందుకు పునరుద్ధరణ డిజైన్లను తీసుకెళ్లనున్నట్లు వెల్లడించారు. సాంకేతిక అనుమతులు లభించిన వెంటనే టెండర్లు పిలిచి నవంబర్లో పనులు ప్రారంభిస్తామని చెప్పారు.
మేడిగడ్డ, అన్నారం, సుందిళ్ల బ్యారేజీల పునాదులను గ్రౌటింగ్ విధానంతో బలోపేతం చేయనున్నట్లు మంత్రి తెలిపారు. 2027 వర్షాకాలం ప్రారంభానికి ముందే మూడు బ్యారేజీల పునరుద్ధరణ పనులను పూర్తి చేయాలని ప్రభుత్వం లక్ష్యంగా పెట్టుకుందని పేర్కొన్నారు.
బ్యారేజీల పునరుద్ధరణలో భద్రత, నాణ్యత విషయంలో ఎలాంటి రాజీ ఉండదని ఉత్తమ్ కుమార్ రెడ్డి స్పష్టం చేశారు. పనుల పురోగతిపై ఆయన అధికారులతో సమీక్ష నిర్వహించి, అవసరమైన చర్యలను వేగంగా చేపట్టాలని ఆదేశించారు.
