telanagana
బొగ్గు కొనుగోళ్లపై సిట్టింగ్ జడ్జితో విచారణ
సూర్య ప్రతినిధి, హైదరాబాద్:ముఖ్యమంత్రి రేవంత్ రెడ్డి చేసిన వ్యాఖ్యలపై భారత్ రాష్ట్ర సమితి (బీఆర్ఎస్) కార్యనిర్వాహక అధ్యక్షుడు కల్వకుంట్ల తారకరామారావు (కేటీఆర్) తీవ్రస్థాయిలో ధ్వజమెత్తారు. విదేశీ బొగ్గు కొనుగోళ్లకు సంబంధించి ప్రభుత్వం సిద్ధమైతే, హైకోర్టు సిట్టింగ్ జడ్జితో విచారణ జరిపించేందుకు తాము సిద్ధంగా ఉన్నామని సీఎంకు సవాల్ విసిరారు. పాలన వదిలేసి కేవలం ప్రచారానికే పరిమితమవుతున్న రేవంత్ రెడ్డికి ధైర్యముంటే తక్షణమే రాష్ట్రంలో సహకార ఎన్నికలను నిర్వహించి తమ సత్తా చాటుకోవాలని కేటీఆర్ సవాల్ చేశారు. పార్టీ పునర్నిర్మాణం, క్షేత్రస్థాయి బలోపేతంలో భాగంగా నర్సంపేట నియోజకవర్గాన్ని తాను దత్తత తీసుకుంటున్నట్లు కేటీఆర్ ప్రకటించారు. నియోజకవర్గంలో నాయకులు, కార్యకర్తలు అంతా ఐక్యతతో ము ముందుకు సాగాలని పిలుపునిచ్చారు. రాబోయే ఎమ్మెల్సీ ఎన్నికల్లో ప్రతీ ఒక్కరూ కష్టపడి పనిచేసి పార్టీ అభ్యర్థుల గెలుపునకు కృషి చేయాలని దిశానిర్దేశం చేశారు.ప్రస్తుతం కొనసాగుతున్న ‘స్పెషల్ ఇంటెన్సివ్ రివిజన్’ (SIR) ప్రక్రియ పూర్తయిన వెంటనే రాష్ట్రవ్యాప్తంగా బీఆర్ఎస్ పార్టీ సభ్యత్వ నమోదు కార్యక్రమాన్ని ప్రారంభిస్తామని కేటీఆర్ స్పష్టం చేశారు.
