ఐఎల్‌టీ20, ఎంఎల్‌సీ లీగ్‌లకు భారీ ఊరట.. విదేశీ ఆటగాళ్ల నిబంధనల మార్పును వాయిదా వేయనున్న ఐసీసీ
సూర్య స్పోర్ట్స్ డెస్క్: ప్రపంచవ్యాప్తంగా నిర్వహిస్తున్న టీ20 ఫ్రాంచైజీ లీగ్‌లపై కఠిన నిబంధనలు విధించేందుకు సిద్ధమైన అంతర్జాతీయ క్రికెట్ మండలి ఐసీసీ తన నిర్ణయాన్ని ప్రస్తుతానికి వాయిదా వేసే అవకాశాలు కనిపిస్తున్నాయి. ఇండోనేషియాలోని బాలి వేదికగా జరుగుతున్న ఐసీసీ త్రైమాసిక సమావేశాల్లో భాగంగా తుది జట్టులో విదేశీ ఆటగాళ్ల సంఖ్యను కేవలం నలుగురికి పరిమితం చేయాలన్న ప్రతిపాదనపై చర్చ జరిగినప్పటికీ తక్షణమే అమలు చేసే సూచనలు లేవని తెలుస్తోంది. దీంతో యూఏఈ వేదికగా జరిగే ఇంటర్నేషనల్ లీగ్ టీ20, అమెరికాలో జరిగే మేజర్ లీగ్ క్రికెట్ నిర్వాహకులకు తాత్కాలికంగా భారీ ఊరట లభించినట్లయింది.
బంగ్లాదేశ్ క్రికెట్ బోర్డు అధ్యక్షుడు తమీమ్ ఇక్బాల్ నేతృత్వంలోని ఐసీసీ ఫ్రాంచైజీ లీగ్‌ల సమీక్షా కమిటీ ఈ సంస్కరణలను ప్రతిపాదించింది. ఈ కమిటీలో బీసీసీఐ కార్యదర్శి దేవజిత్ సైకియా, ఇంగ్లండ్ క్రికెట్ బోర్డు సీఈఓ రిచర్డ్ గౌల్డ్, క్రికెట్ ఆస్ట్రేలియా సీఈఓ టాడ్ గ్రీన్‌బర్గ్ సభ్యులుగా ఉన్నారు. ప్రపంచవ్యాప్తంగా అన్ని టీ20 లీగ్‌లలో తుది జట్టులో గరిష్టంగా నలుగురు విదేశీ ఆటగాళ్లకు మాత్రమే అవకాశం ఇవ్వాలని, లీగ్‌ల అనుమతులపై ఐసీసీకి పూర్తి అధికారాలు ఉండాలని, బెట్టింగ్ సంస్థల స్పాన్సర్‌షిప్‌లపై ఆంక్షలు విధించాలని, అవినీతి నిరోధక పర్యవేక్షణను కఠినతరం చేయాలని ఈ బృందం సిఫార్సు చేసింది.
ప్రస్తుతం ఐఎల్‌టీ20 లీగ్‌లో తుది జట్టులో ఒక అసోసియేట్ దేశపు ఆటగాడితో కలిపి గరిష్టంగా తొమ్మిది మంది విదేశీ ఆటగాళ్లు ఆడే వెసులుబాటు ఉండగా, ఎంఎల్‌సీలో ఆరుగురు విదేశీ ఆటగాళ్లకు అవకాశం కల్పిస్తున్నారు. యూఏఈ, అమెరికా దేశాల్లో స్థానిక ఆటగాళ్ల సంఖ్య తక్కువగా ఉన్నందున విదేశీ స్టార్ క్రికెటర్లపై ఆధారపడకపోతే లీగ్‌ల వాణిజ్య విలువ, పోటీతత్వం దెబ్బతింటుందని నిర్వాహకులు వాదిస్తున్నారు. గతంలో 2023లో నిబంధనలు రూపొందించినప్పుడు ఈ రెండు లీగ్‌లకు ప్రత్యేక మినహాయింపు ఇచ్చామని, ఇప్పుడు అకస్మాత్తుగా నిబంధనలు మార్చడం సరికాదని సంబంధిత వర్గాలు అభ్యంతరం వ్యక్తం చేస్తున్నాయి.
మరోవైపు నవంబర్ 22 నుంచి ఐఎల్‌టీ20 తదుపరి సీజన్ ప్రారంభం కానున్న నేపథ్యంలో ఇప్పుడు నిబంధనలు మారిస్తే జట్ల కూర్పు పూర్తిగా దెబ్బతినే ప్రమాదం ఉంది. అంతేకాకుండా ఐఎల్‌టీ20లోని ఆరు ఫ్రాంచైజీలలో నాలుగు, ఎంఎల్‌సీలోని మూడు ఫ్రాంచైజీలలో ఐపీఎల్ జట్ల యజమానులకు భాగస్వామ్యం ఉండటం కూడా ఈ చర్చల్లో కీలకంగా మారింది. బాలిలో జరిగిన చీఫ్ ఎగ్జిక్యూటివ్స్ కమిటీ సమావేశాల్లో ఈ అంశంపై ప్రాథమికంగా చర్చించారని, ఆదివారం జరిగే బోర్డు సమావేశంలోనూ కేవలం అభిప్రాయ సేకరణ మాత్రమే ఉంటుందని, విస్తృత సంప్రదింపుల తర్వాతే తుది నిర్ణయం తీసుకుంటారని ఐసీసీ వర్గాల ద్వారా తెలుస్తోంది.
Also Read: సయ్యద్ ముస్తాక్ అలీ ట్రోఫీ 2026 తొలి రోజు సమరం.. మయాంక్ యాదవ్ నిప్పులు, సూర్యవంశీకి నిరాశ
