సాండ్‌పేపర్ వివాదంపై వసీం అక్రమ్ కీలక వ్యాఖ్యలు.. పాట్ కమిన్స్ వాదనపై ఏమన్నారంటే?
సూర్య స్పోర్ట్స్ డెస్క్: ఆస్ట్రేలియా క్రికెట్‌లో మరోసారి రాజుకున్న సాండ్‌పేపర్ బాల్ ట్యాంపరింగ్ వివాదంపై పాకిస్థాన్ మాజీ కెప్టెన్, దిగ్గజ పేసర్ వసీం అక్రమ్ స్పందించారు. 2018 కేప్‌టౌన్ టెస్ట్ సందర్భంగా బంతిపై సాండ్‌పేపర్ ఉపయోగించిన విషయం ఆస్ట్రేలియా బౌలింగ్ విభాగానికి తెలియదంటూ టెస్ట్ కెప్టెన్ పాట్ కమిన్స్ చేసిన వ్యాఖ్యలపై అక్రమ్ తనదైన శైలిలో విశ్లేషణ చేశారు. ఒక అనుభవజ్ఞుడైన బౌలర్‌గా బంతి స్థితిగతులను దగ్గరగా గమనించే అవకాశం ఉంటుందని, సాండ్‌పేపర్ వల్ల ఏర్పడే గీతలు సహజంగా పడే వాటికి పూర్తి భిన్నంగా ఉంటాయని ఆయన అభిప్రాయపడ్డారు.
ఫాస్ట్ బౌలర్‌గా తన అనుభవాన్ని పంచుకుంటూ, ఐదో ఓవర్ నుంచి యాభయ్యో ఓవర్ వరకు బంతి ఎలా మారుతుందో బౌలర్లు నిశితంగా గమనిస్తుంటారని అక్రమ్ పేర్కొన్నారు. ఒక వైపు మెరుపు ఉంచుతూ, పిచ్ లేదా బౌన్స్ ద్వారా మరో వైపు సహజంగా గరుకుదనం వచ్చేలా చూస్తుంటారని తెలిపారు. అనుభవజ్ఞుడైన బౌలర్ బంతిని చూడగానే అందులో ఏదో తేడా ఉందని వెంటనే పసిగట్టగలడని, కొంత పాతబడిన క్రికెట్ బంతిపై సాండ్‌పేపర్‌తో రుద్దితే వచ్చే గీతలు పూర్తిగా భిన్నంగా ఉంటాయని ఆయన స్పష్టం చేశారు. కావాలంటే అభిమానులు కూడా స్వయంగా పరీక్షించి చూడవచ్చని వ్యాఖ్యానించారు.
అయితే పాట్ కమిన్స్‌ను వ్యక్తిగతంగా తప్పుబట్టేందుకు వసీం అక్రమ్ ఇష్టపడలేదు. కమిన్స్ తనకు మంచి మిత్రుడని, ప్రపంచ క్రికెట్‌లోని అత్యుత్తమ నాయకులలో ఒకరని కొనియాడారు. తాను ఏ ఒక్క పక్షానికీ వత్తాసు పలకడం లేదని, ఆస్ట్రేలియన్లు సాధారణంగా నిజాయతీగా, సూటిగా ఉంటారని ప్రశంసించారు. ఈ వివాదం వల్ల ఆస్ట్రేలియా క్రికెట్‌పై ఏర్పడిన ఒత్తిడి త్వరగా తొలగిపోవాలని ఆకాంక్షించారు.
ఎనిమిదేళ్ల క్రితం న్యూలాండ్స్ వేదికగా జరిగిన ఈ ఘటనలో స్టీవ్ స్మిత్, డేవిడ్ వార్నర్, కామెరాన్ బాన్‌క్రాఫ్ట్‌లపై నిషేధం పడిన విషయం తెలిసిందే. ఇటీవల మాజీ ఓపెనర్ ఉస్మాన్ ఖవాజా డ్రెస్సింగ్ రూమ్‌లో బౌలర్లతో సహా అందరికీ ఈ విషయం తెలుసంటూ వ్యాఖ్యానించడంతో వివాదం మళ్లీ తెరపైకి వచ్చింది. శుక్రవారం సిడ్నీలో మీడియాతో మాట్లాడిన కమిన్స్ ఖవాజా ఆరోపణలను పూర్తిగా ఖండిస్తూ, 2021లో బౌలింగ్ బృందం ఇచ్చిన సంయుక్త ప్రకటనకు కట్టుబడి ఉన్నామని స్పష్టం చేశారు. మరోవైపు డేవిడ్ వార్నర్ మాత్రం ఖవాజా వ్యాఖ్యలకు మద్దతు తెలపడం ఈ వ్యవహారంలో మరింత ఆసక్తిని రేకెత్తించింది.
Also Read: ఐఎల్‌టీ20, ఎంఎల్‌సీ లీగ్‌లకు భారీ ఊరట.. విదేశీ ఆటగాళ్ల నిబంధనల మార్పును వాయిదా వేయనున్న ఐసీసీ
