శాండ్‌పేపర్ విచారణలో పూర్తి సాక్ష్యాలు ఎందుకు ఇవ్వలేదు.. క్రికెట్ ఆస్ట్రేలియాపై డేవిడ్ వార్నర్ ప్రశ్నల వర్షం
సూర్య స్పోర్ట్స్ డెస్క్: 2018 శాండ్‌పేపర్ బాల్ ట్యాంపరింగ్ వివాదంపై క్రికెట్ ఆస్ట్రేలియా జరిపిన విచారణ తీరుపై ఆస్ట్రేలియా మాజీ ఓపెనర్ డేవిడ్ వార్నర్ మరోసారి తీవ్రస్థాయిలో ప్రశ్నలు సంధించారు. ఆనాటి ఘటనకు సంబంధించి తమకు పూర్తి సాక్ష్యాధారాలను ఎందుకు అందించలేదని, కీలక సమాచారాన్ని ఎందుకు దాచిపెట్టారని ఆయన నిలదీశారు. 2018లో తాము కీలక నిర్ణయాలు తీసుకోవాల్సి వచ్చినప్పుడు, క్రికెట్ ఆస్ట్రేలియా వద్ద ఉన్న అన్ని వివరాలు అంది ఉంటే ఎంతో ఉపయోగకరంగా ఉండేదని సోషల్ మీడియా వేదికగా వార్నర్ స్పష్టం చేశారు.
కేప్‌టౌన్ టెస్టులో కామెరాన్ బాన్‌క్రాఫ్ట్ శాండ్‌పేపర్ ఉపయోగిస్తూ కెమెరాకు చిక్కిన తర్వాత, వైస్ కెప్టెన్ పదవి నుంచి వార్నర్ తప్పుకున్నారు. అనంతరం ఆటగాళ్లపై క్రికెట్ ఆస్ట్రేలియా కఠిన చర్యలు తీసుకుంది. వార్నర్, అప్పటి కెప్టెన్ స్టీవ్ స్మిత్‌లపై 12 నెలల నిషేధం విధించడంతో పాటు, వార్నర్‌పై నాయకత్వ బాధ్యతల విషయంలో జీవితకాల నిషేధం వంటి తీవ్రమైన ఆంక్షలు అమల్లోకి వచ్చాయి. ఈ విచారణ మొత్తం తూతూమంత్రంగా సాగిందని, ఇది ఒక కవర్ అప్‌లా ఉందని వార్నర్ ఇప్పటికే సంచలన ఆరోపణలు చేశారు.
ఆనాటి విచారణలో బౌలర్లను కూడా ప్రశ్నించారా లేదా అన్న విషయాన్ని తనకు ఎప్పుడూ చెప్పలేదని డేవిడ్ వార్నర్ పేర్కొన్నారు. ఉస్మాన్ ఖవాజా తన ఆత్మకథలో వెల్లడించిన అంశాలకు తాను పూర్తి మద్దతుగా నిలుస్తున్నానని, ఆనాటి పరిస్థితులపై నిజాలు బయటకు రావాల్సిన అవసరం ఉందని అన్నారు. ఏళ్ల తరబడి తాము ఎదుర్కొంటున్న మానసిక ఒత్తిడి, శిక్షల నేపథ్యంలో విచారణ పారదర్శకతపై డేవిడ్ వార్నర్ లేవనెత్తిన ప్రశ్నలు అంతర్జాతీయ క్రికెట్‌లో మరోసారి తీవ్ర చర్చకు దారితీశాయి.
Also Read: ఆరు బంతుల్లో రెండు వికెట్లు.. ఐదో వన్డేలో న్యూజిలాండ్‌కు షాకిచ్చి రేసులోకి దూసుకొచ్చిన భారత్
