పంచాయతీ ఎన్నికల్లో అఖండ మెజారిటీ సాధించాలి : పార్టీ శ్రేణులకు ఎమ్మెల్యే ఏలూరి దిశానిర్దేశం

మార్టూరు, మేజర్‌న్యూస్‌ :

రాబోయే పంచాయతీ ఎన్నికల్లో తెలుగుదేశం పార్టీ అఖండ మెజారిటీతో విజయం సాధించేలా ప్రతి ఒక్కరూ సమన్వయంతో సమష్టిగా పనిచేయాలని పర్చూరు ఎమ్మెల్యే ఏలూరి సాంబశివరావు పార్టీ శ్రేణులకు పిలుపునిచ్చారు.  ఎమ్మెల్యే ఏలూరి క్యాంపు కార్యాలయంలో మార్టూరు, నాగులపాలెం, పర్చూరు, డేగర్లమూడి ప్రాంతాలకు చెందిన పార్టీ నాయకులు, ముఖ్య కార్యకర్తలతో స్థానిక సంస్థల ఎన్నికలపై ఆయన సమీక్ష సమావేశం నిర్వహించారు. ఈ సందర్భంగా ఎన్నికల సన్నద్ధత, గ్రామస్థాయిలో పార్టీ బలోపేతం, నాయకులు, కార్యకర్తల మధ్య సమన్వయం తదితర అంశాలపై చర్చించి దిశానిర్దేశం చేశారు.ఈ సందర్భంగా ఎమ్మెల్యే ఏలూరి మాట్లాడుతూ.. పంచాయతీ ఎన్నికలను పార్టీ శ్రేణులంతా ప్రతిష్ఠాత్మకంగా తీసుకోవాలని సూచించారు. ప్రతి గ్రామంలో పార్టీ నాయకులు, కార్యకర్తలు సమన్వయంతో ముందుకు సాగాలని, ప్రజలతో నిరంతరం మమేకమవుతూ ప్రభుత్వ సంక్షేమ పథకాలు, అభివృద్ధి కార్యక్రమాలను ప్రజల్లోకి తీసుకెళ్లాలని తెలిపారు. గ్రామస్థాయిలో పార్టీకి బలమైన పునాది ఉందని, నాయకులంతా వ్యక్తిగత అభిప్రాయాలకు తావివ్వకుండా పార్టీ విజయమే లక్ష్యంగా పనిచేయాలని పేర్కొన్నారు. ప్రతి గ్రామంలో పరిస్థితులను ఎప్పటికప్పుడు సమీక్షించుకుంటూ ఎన్నికల వ్యూహాలను రూపొందించుకోవాలని సూచించారు. కూటమి ప్రభుత్వం అమలు చేస్తున్న అభివృద్ధి, సంక్షేమ కార్యక్రమాలను ప్రజలకు వివరించి, ప్రజల మద్దతుతో పంచాయతీ ఎన్నికల్లో అత్యధిక స్థానాల్లో విజయం సాధించే దిశగా ప్రతి ఒక్కరూ కృషి చేయాలని ఎమ్మెల్యే ఏలూరి పిలుపునిచ్చారు.