చెన్నై సూపర్ కింగ్స్‌లో భారీ మార్పులు: 19 ఏళ్ల అనుబంధానికి గుడ్‌బై చెప్పిన మైక్ హస్సీ, కొత్త కోచ్ ఎవరంటే?
ఇండియన్ ప్రీమియర్ లీగ్ రాబోయే సీజన్ కంటే ముందే చెన్నై సూపర్ కింగ్స్ ఫ్రాంచైజీలో భారీ మార్పులు చోటుచేసుకుంటున్నాయి. ఐదుసార్లు ఛాంపియన్‌గా నిలిచిన సీఎస్‌కే తమ సపోర్ట్ స్టాఫ్‌ను ప్రక్షాళన చేసే దిశగా వేగంగా అడుగులు వేస్తోంది. ఇందులో భాగంగానే జట్టు బ్యాటింగ్ కోచ్‌గా వ్యవహరిస్తున్న ఆస్ట్రేలియా మాజీ క్రికెటర్ మైక్ హస్సీతో ఉన్న 19 ఏళ్ల సుదీర్ఘ అనుబంధానికి ఫ్రాంచైజీ ముగింపు పలికింది. 2008 ఐపీఎల్ తొలి సీజన్ నుంచి ఆటగాడిగా, ఆ తర్వాత బ్యాటింగ్ కోచ్‌గా సీఎస్‌కే విజయాల్లో మైక్ హస్సీ కీలక పాత్ర పోషించిన విషయం తెలిసిందే.
మైక్ హస్సీకి వీడ్కోలు చెబుతూ సీఎస్‌కే యాజమాన్యం సోషల్ మీడియా వేదికగా భావోద్వేగపూరితమైన సందేశాన్ని పంచుకుంది. మైదానంలో ఆటగాడిగా అందించిన పరుగులు, కోచ్‌గా యువ ఆటగాళ్లకు అందించిన మార్గదర్శకత్వం ఎప్పటికీ మరచిపోలేమని పేర్కొంది. అభిమానులు హస్‌మాస్టర్ అని ఆప్యాయంగా పిలుచుకునే ఆయన సేవలను కొనియాడింది. హస్సీతో పాటు సుదీర్ఘకాలంగా బౌలింగ్ కోచ్‌గా పనిచేస్తున్న ఎరిక్ సిమన్స్, అసిస్టెంట్ కోచ్ రాజీవ్ కుమార్, ఫీల్డింగ్ కోచ్ జేమ్స్ ఫోస్టర్‌లకు కూడా యాజమాన్యం సాగనంపింది.
ఈ భారీ మార్పుల నేపథ్యంలో సీఎస్‌కే తమ నూతన సపోర్ట్ స్టాఫ్‌ను ప్రకటించింది. ఇంగ్లండ్ మాజీ స్పిన్నర్ గారెత్ బ్యాటీని జట్టు సహాయ కోచ్‌గా నియమించారు. ఇటీవల కౌంటీ ఛాంపియన్‌షిప్‌లో సర్రే జట్టును వరుసగా మూడుసార్లు విజేతగా నిలిపిన ట్రాక్ రికార్డ్ ఆయనకు ఉంది. అలాగే కొత్తగా బాధ్యతలు చేపట్టిన ప్రధాన కోచ్ జహీర్ ఖాన్‌తో గారెత్ బ్యాటీకి మంచి సాన్నిహిత్యం ఉంది. మరోవైపు చెన్నై మాజీ బౌలర్, భారత మాజీ పేసర్ మోహిత్ శర్మను బౌలింగ్ కోచ్‌గా నియమిస్తూ ఫ్రాంచైజీ నిర్ణయం తీసుకుంది.
గత కొన్ని సీజన్లుగా చెన్నై సూపర్ కింగ్స్ వరుస వైఫల్యాలను చవిచూడటంతోనే మేనేజ్‌మెంట్ ఈ తరహా కఠిన నిర్ణయాలు తీసుకున్నట్లు తెలుస్తోంది. 2023లో టైటిల్ సాధించిన అనంతరం 2024, 2025, 2026 సీజన్లలో వరుసగా పాయింట్ల పట్టికలో దిగువ స్థానాలకే పరిమితం కావడం అభిమానులను తీవ్రంగా నిరాశపరిచింది. దీంతో దశాబ్దకాలంగా ప్రధాన కోచ్‌గా ఉన్న స్టీఫెన్ ఫ్లెమింగ్‌ను కూడా మార్చి జహీర్ ఖాన్ నేతృత్వంలో కొత్త కోచింగ్ బృందాన్ని సిద్ధం చేశారు. కొత్త వ్యూహాలు, కొత్త కోచింగ్ స్టాఫ్‌తో రాబోయే సీజన్‌లో మళ్లీ ఛాంపియన్‌గా నిలవాలని సీఎస్‌కే పట్టుదలతో ఉంది.
Also Read: టీమిండియాకు అరుదైన వజ్రం దొరికాడు.. యువ ఆటగాళ్లపై అజింక్య రహానే ప్రశంసల జల్లు!sp
