పత్తి కాయలకు కోతుల బెడద! వందల సంఖ్యలో పొలాల్లోకి కోతులు-పంట నష్టంతో రైతుల ఆందోళన-పంటను కాపాడేందుకు రైతుల అవస్థలు-అధికారులు స్పందించాలని విజ్ఞప్తి

మల్హర్‌ , మేజర్ న్యూస్, భూపాలపల్లి జిల్లా మల్హర్ రావు మండల కేంద్రమైన తాడిచెర్లలో పత్తి సాగు చేస్తున్న రైతులకు కోతుల బెడద తీవ్ర ఇబ్బందిగా మారింది. వందల సంఖ్యలో గుంపులుగా పత్తి చేన్ల పైకి వస్తున్న కోతులు పత్తి మొక్కలపై ఉన్న కాయలను తింటూ పంటకు నష్టం కలిగిస్తున్నాయి. దీంతో పంటను కాపాడుకునేందుకు రైతులు నానా అవస్థలు పడుతున్నారు.
పత్తి సాగు కోసం ఇప్పటికే పెట్టుబడులు పెట్టిన రైతులు, కోతుల దాడులతో ఆందోళన చెందుతున్నారు. పంట చేతికొచ్చే సమయంలో కోతుల బెడద పెరగడంతో దిగుబడిపై ప్రభావం పడుతుందేమోనని ఆవేదన వ్యక్తం చేస్తున్నారు. పత్తి సాగు పంటల పైకీ వస్తున్న కోతులను తరిమేందుకు రైతులు సమయం వెచ్చించాల్సి వస్తోందని చెబుతున్నారు.సంబంధిత అధికారులు స్పందించి, కోతుల బెడదను తగ్గించేందుకు తగిన చర్యలు తీసుకోవాలని పత్తి రైతులు కోరుతున్నారు. పంట నష్టాన్ని నివారించేలా చర్యలు చేపట్టి తమకు ఉపశమనం కల్పించాలని విజ్ఞప్తి చేస్తున్నారు.

రిపోర్టర్ ;ప్రభాకర్ ,మలహర్ మండలం, జయశంకర్ భూపాలపల్లి జిల్లా