ఉద్యోగం పేరుతో మోసం.. మహిళపై అత్యాచారం

ఘట్‌కేసర్, మేజర్ న్యూస్:ప్రభుత్వ ఉద్యోగం ఇప్పిస్తానని నమ్మించి డబ్బులు వసూలు చేయడమే కాకుండా, మహిళపై అత్యాచారానికి పాల్పడిన సంఘటన ఘట్‌కేసర్ పోలీస్ స్టేషన్ పరిధిలో చోటుచేసుకుంది. పోలీసుల వివరాల ప్రకారం మల్లాపూర్‌లో టైలరింగ్‌ పని చేసుకుంటూ జీవనం సాగిస్తున్న 30 ఏళ్ల మహిళకు నాలుగు నెలల క్రితం భువనగిరికి చెందిన జగన్మోహన్‌ ఫోన్‌ ద్వారా పరిచయమయ్యాడు. భువనగిరి మున్సిపల్‌ కార్యాలయంలో ఉద్యోగం ఇప్పిస్తానని, ఇందుకు రూ.5 లక్షలు ఖర్చవుతాయని నమ్మించాడు.
ఈ క్రమంలో అక్టోబరు 26న మల్లాపూర్‌లోని రత్నదీప్‌ సమీపంలో మహిళను తన కారులో ఎక్కించుకున్న జగన్మోహన్‌.. భువనగిరి మున్సిపల్‌ కార్యాలయానికి తీసుకెళ్తానని చెప్పి ఔషాపూర్‌లోని శ్రీనిధి రిసార్ట్‌కు తీసుకెళ్లినట్లు బాధితురాలు ఫిర్యాదులో పేర్కొంది. మార్గమధ్యంలో రూ.4.5 లక్షలు తీసుకుని కారు డ్యాష్‌బోర్డులో పెట్టుకున్నాడని తెలిపింది. రిసార్ట్‌లోని గదిలోకి తీసుకెళ్లి బలవంతంగా దాడి చేసి, తన ఇష్టానికి వ్యతిరేకంగా అత్యాచారానికి పాల్పడ్డాడని ఆరోపించింది. అనంతరం కారులో తీసుకెళ్లి హైవేపై కారు నుంచి తోసేసి వెళ్లిపోయాడని ఫిర్యాదులో పేర్కొంది. బాధితురాలి ఫిర్యాదు మేరకు ఘట్కేసర్‌ పోలీసులు కేసు నమోదు చేసి దర్యాప్తు చేస్తున్నారు.