సైబర్ ముఠాలపై వేటు..

హైదరాబాద్:సైబర్ నేరగాళ్లకు మ్యూల్ (నకిలీ) బ్యాంక్ ఖాతాలను అందిస్తున్న అంతర్రాష్ట్ర ముఠాపై తెలంగాణ సైబర్ సెక్యూరిటీ బ్యూరో (TGCSB) భారీ ఆపరేషన్ చేపట్టింది. 6 రాష్ట్రాల్లో ఏకకాలంలో నిర్వహించిన ఈ స్పెషల్ డ్రైవ్‌లో 18 మంది మహిళలతో సహా మొత్తం 101 మంది నిందితులను పోలీసులు అరెస్ట్ చేశారు.

తెలంగాణ, ఆంధ్రప్రదేశ్, కేరళ, తమిళనాడు, కర్ణాటక, పుదుచ్చేరి రాష్ట్రాల్లో ఈ విస్తృత తనిఖీలు నిర్వహించారు. దేశవ్యాప్తంగా దాదాపు 1,172 సైబర్ కేసాల్లో ఈ ముఠా పాత్ర ఉన్నట్లు సైబర్ క్రైమ్ బ్యూరో గుర్తించింది. సైబర్ నేరగాళ్లకు నకిలీ కేవైసీ (KYC) వివరాలతో మ్యూల్ ఖాతాలు, డెబిట్ కార్డులు, పాస్‌బుక్కులను సమకూర్చడమే ఈ ముఠా ప్రధాన విధిగా తేలింది. పట్టుబడిన నిందితుల నుంచి భారీగా బ్యాంక్ ఖాతా పత్రాలు, సిమ్ కార్డులను స్వాధీనం చేసుకున్న పోలీసులు, వారిని ట్రాన్సిట్ వారెంట్‌పై హైదరాబాద్‌కు తరలించి దర్యాప్తును వేగవంతం చేశారు.