లోక్‌సభ స్పీకర్ ఓం బిర్లాతో ఎంపీ గంటి హరీష్ భేటీ
విజయవాడ దసరా వేడుకలు, 'విజయవాడ ఉత్సవ్ 2.0'కు సాదర ఆహ్వానం!
సూర్య జాతీయ డెస్క్: లోక్‌సభ స్పీకర్ శ్రీ ఓం బిర్లాను అమలాపురం పార్లమెంట్ సభ్యుడు గంటి హరీష్ మాధుర్ (బాలయోగి) న్యూఢిల్లీలో మర్యాదపూర్వకంగా కలిశారు. ఈ సందర్భంగా స్పీకర్ ఓం బిర్లాకు శాలువా కప్పి, భగవంతుని ప్రతిమను బహూకరించి సాదర సత్కారం చేశారు. అనంతరం విజయవాడ ఇంద్రకీలాద్రిపై వైభవంగా జరగనున్న శ్రీ దుర్గా మల్లేశ్వర స్వామి వార్ల దసరా శరన్నవరాత్రి మహోత్సవాలతో పాటు, ప్రతిష్టాత్మకంగా నిర్వహించనున్న 'విజయవాడ ఉత్సవ్ 2.0' వేడుకలకు ముఖ్య అతిథిగా విచ్చేయాల్సిందిగా స్పీకర్‌ను సాదరంగా ఆహ్వానించారు.
విజయవాడలో దసరా పర్వదినాల సందర్భంగా సాంస్కృతిక, ఆధ్యాత్మిక వైభవాలను చాటేలా నిర్వహిస్తున్న 'విజయవాడ ఉత్సవ్ 2.0' విశిష్టతలను, ఏర్పాట్లను ఎంపీ హరీష్ స్పీకర్‌కు వివరించారు. కృష్ణా నదీ తీరాన నిర్వహించనున్న వివిధ సాంస్కృతిక కార్యక్రమాలు, సంప్రదాయ కళారూపాలు, డ్రోన్ ప్రదర్శనలు మరియు ప్రజల భాగస్వామ్యంతో చేపట్టే వినూత్న ఈవెంట్ల వివరాలను తెలియజేశారు.
ఈ ఆహ్వానంపై లోక్‌సభ స్పీకర్ ఓం బిర్లా ఎంతో సానుకూలంగా స్పందిస్తూ, విజయవాడ పండుగ వాతావరణాన్ని, సంస్కృతిని ప్రతిబింబించేలా ఇలాంటి బృహత్తర కార్యక్రమాలు చేపట్టడం అభినందనీయమని కొనియాడారు. అనంతరం రాష్ట్రానికి సంబంధించిన పలు అభివృద్ధి అంశాలు, తాజా పరిణామాలపై స్పీకర్‌తో ఎంపీ చర్చించారు.
