అసాంఘిక శక్తులపై ఉక్కుపాదం గుంతకల్‌లో 180 మంది పోలీసులతో విస్తృత సోదాలు..
సూర్య, అనంతపురం బ్యూరో : పట్టణంలో అసాంఘిక కార్యకలాపాలకు అడ్డుకట్ట వేసేందుకు పోలీసులు విస్తృత తనిఖీలు నిర్వహించారు. జిల్లా ఎస్పీ పి. జగదీష్, ఐపీఎస్ ఆదేశాల మేరకు గుంతకల్ డీఎస్పీ బి. శ్రీనివాస్‌రావు ఆధ్వర్యంలో 180 మంది పోలీసు సిబ్బందితో గుంతకల్ వన్‌టౌన్ పోలీస్ స్టేషన్ పరిధిలో ప్రత్యేక తనిఖీలు చేపట్టారు.
గంగానగర్, షికారి కాలనీ, బెంచికొట్టాల, రైల్వే స్టేషన్ పరిసరాలు, కసాపురం ఫ్యాక్షన్ గ్రామం, గుంతకల్–ధోనిముక్కల రోడ్డు ప్రాంతాల్లో రౌడీషీటర్ల ఇళ్లు, అనుమానితుల ఇళ్లు, అనుమానాస్పద ప్రదేశాల్లో పోలీసులు క్షుణ్ణంగా సోదాలు నిర్వహించారు.
ఈ సందర్భంగా డీఎస్పీ శ్రీనివాస్‌రావు మాట్లాడుతూ.. రాబోయే స్థానిక సంస్థల ఎన్నికల నేపథ్యంలో రౌడీషీటర్లు సత్ప్రవర్తనతో మెలగాలని సూచించారు. ఎవరైనా నేరాలకు పాల్పడితే కఠిన చర్యలు తప్పవని హెచ్చరించారు. ఇప్పటికే పలు నేరాల్లో ఉన్న వ్యక్తులు తమ ప్రవర్తన మార్చుకోకుండా మళ్లీ నేరాలకు పాల్పడితే వారిపై రౌడీషీట్ తెరవడంతో పాటు నిరంతరం నిఘా ఉంచుతామని తెలిపారు. అవసరమైతే పీడీ యాక్ట్‌ను కూడా ప్రయోగిస్తామని స్పష్టం చేశారు.
అక్రమ ఆయుధాలు, వాహనాలు కలిగి ఉన్న వారిపై ఆయుధాల చట్టం కింద కేసులు నమోదు చేస్తామని హెచ్చరించారు. పట్టణంలో గంజాయి విక్రయాలు, మట్కా, జూదం వంటి అసాంఘిక కార్యకలాపాలకు పాల్పడే వారిపై కఠిన చర్యలు తీసుకుంటామని పేర్కొన్నారు. పార్టీల మధ్య లేదా కమ్యూనిటీల మధ్య ఘర్షణలు సృష్టించేందుకు ప్రయత్నించే వారిని గుర్తించి, అవసరమైతే సస్పెక్ట్ షీట్లు తెరిచి నిఘా పెడతామని తెలిపారు.
ఇదే సమయంలో దొంగతనాలు, చైన్ స్నాచింగ్, సైబర్ నేరాలపై మహిళలు, వృద్ధులకు పోలీసులు అవగాహన కల్పించారు. ప్రజలకు అందుబాటులో ఉంటూ అంకితభావంతో, సేవా దృక్పథంతో పనిచేసి పోలీస్ శాఖ ప్రతిష్ఠను పెంచేందుకు కృషి చేస్తామని డీఎస్పీ తెలిపారు.
ఈ తనిఖీల్లో గుంతకల్ వన్‌టౌన్ ఎస్సై కళ్యాణ్, టూటౌన్ ఎస్సై సురేష్, రూరల్ ఎస్సై బాలముని, కసాపురం ఎస్సై వెంకటస్వామి, 180 మంది ప్రొబేషనరీ కానిస్టేబుళ్లు, స్థానిక పోలీసు సిబ్బంది, మహిళా పోలీసులు పాల్గొన్నారు.
రిపోర్టర్ : మొయినుద్దీన్, అనంతపురం బ్యూరో, అనంతపురం.
