ప్రజాధనంలో ప్రతి రూపాయికి లెక్క ఉండాలి.. లోక్‌సభ స్పీకర్ ఓం బిర్లా ఉద్ఘాటన
సూర్య జాతీయ డెస్క్: ప్రజాధనంలో ప్రతి రూపాయికి పూర్తి బాధ్యత ఉండాలని, కేటాయించిన నిధులు నిర్దేశిత ప్రయోజనాలకే ఖర్చయ్యేలా పబ్లిక్ అకౌంట్స్ కమిటీలు (పీఏసీ) కఠిన నిఘా పెట్టాలని లోక్‌సభ స్పీకర్ ఓం బిర్లా స్పష్టం చేశారు. కేరళలోని తిరువనంతపురంలో పార్లమెంట్ మరియు రాష్ట్ర శాసనసభల పీఏసీ చైర్‌పర్సన్‌ల అఖిల భారత సదస్సు మంగళవారం ఘనంగా ప్రారంభమైంది. ఈ కార్యక్రమాన్ని ప్రారంభించి మాట్లాడిన ఆయన, ప్రభుత్వ ఖర్చులు పారదర్శకంగా ఉండటంతో పాటు అవి ప్రజల జీవితాలలో నిజమైన మార్పును తెచ్చేలా ఉండాలని పిలుపునిచ్చారు.
ఆడిట్ అబ్జర్వేషన్లు పదేళ్లు, పదిహేనేళ్లు లేదా ఇరవై సంవత్సరాల పాటు పెండింగ్‌లో ఉండటంపై ఆయన తీవ్ర ఆందోళన వ్యక్తం చేశారు. ఈ పెండింగ్ అంశాలను సత్వరమే పరిష్కరించేందుకు ఒక నిర్దిష్టమైన కార్యాచరణ ప్రణాళికను రూపొందించాలని సూచించారు. కేవలం లెక్కలను పరిశీలించడమే కాకుండా, చేపట్టిన అభివృద్ధి పనులు మరియు సంక్షేమ పథకాలు తమ లక్ష్యాలను ఎంతవరకు సాధించాయనే దానిపై ప్రజాప్రతినిధులు ఆడిట్ చేయాలని ఆయన పేర్కొన్నారు. ఆర్థిక నిధుల దుర్వినియోగాన్ని అరికట్టడంలో శాసనసభ కమిటీల పాత్ర అత్యంత కీలకమని కొనియాడారు.
ప్రభుత్వ ప్రాజెక్టుల నాణ్యతను పరిశీలించేందుకు కమిటీ సభ్యులు స్వయంగా క్షేత్రస్థాయిలో పర్యటించాలని ఓం బిర్లా సూచించారు. ఆధునిక కాలంలో డేటా అనలిటిక్స్ మరియు కృత్రిమ మేధస్సు (ఆర్టిఫిషియల్ ఇంటెలిజెన్స్) వంటి సాంకేతికతలను ఉపయోగించి భారీ ఆర్థిక లావాదేవీలను విశ్లేషించడం సులభమవుతుందని తెలిపారు. ప్రజాస్వామ్య వ్యవస్థపై ప్రజల నమ్మకాన్ని మరింత బలపేతం చేయడానికి పారదర్శకత, జవాబుదారీతనం అత్యంత ఆవశ్యకమని ఆయన పునరుద్ఘాటించారు.
