బెంగళూరులో ఉద్రిక్తత: సిద్ధరామయ్య నివాసం వైపు బీజేపీ ర్యాలీ భగ్నం

సూర్య నేషనల్ & రీజినల్ బ్యూరో, బెంగళూరు: కర్ణాటక కాంగ్రెస్ ప్రభుత్వంలోని సీనియర్ మంత్రి చేసిన వివాదాస్పద వ్యాఖ్యలపై భారతీయ జనతా పార్టీ (BJP) తీవ్ర ఆగ్రహం వ్యక్తం చేసింది. మంత్రి వ్యాఖ్యలను నిరసిస్తూ బెంగళూరు నగరంలో సోమవారం బీజేపీ శ్రేణులు భారీ నిరసన ప్రదర్శన చేపట్టాయి. ముఖ్యమంత్రి సిద్ధరామయ్య అధికారిక నివాసం వైపు ర్యాలీగా వెళ్లేందుకు యత్నించిన పలువురు కీలక బీజేపీ నాయకులు, ప్రజాప్రతినిధులు, కార్యకర్తలను పోలీసులు ముందస్తుగా అడ్డుకుని అదుపులోకి తీసుకున్నారు.

భారీగా మోహరించిన పోలీసులు – సీఎం నివాసం ముట్టడికి యత్నం:
బీజేపీ రాష్ట్ర విభాగం పిలుపు మేరకు రాజధాని బెంగళూరులోని మౌర్య సర్కిల్ వద్ద పార్టీ నాయకులు, కార్యకర్తలు ప్లకార్డులతో బైఠాయించి కాంగ్రెస్ ప్రభుత్వానికి వ్యతిరేకంగా నినాదాలు చేశారు. అక్కడి నుంచి ముఖ్యమంత్రి కావేరి నివాసం ముట్టడికి దూసుకెళ్లేందుకు యత్నించడంతో పోలీసులు బారికేడ్లను ఏర్పాటు చేసి అడ్డుకున్నారు. ఈ క్రమంలో పోలీసులకు, నిరసనకారులకు మధ్య తీవ్ర తోపులాట జరిగింది. శాంతిభద్రతల పరిరక్షణ దృష్ట్యా ఆందోళనకారులను బలవంతంగా పోలీస్ వ్యాన్లలోకి ఎక్కించి సమీప పోలీస్ స్టేషన్లకు తరలించారు.