ఫ్రాన్స్లో ఉప్పొంగుతున్న విద్యార్థి నిరసనలు
సూర్య అంతర్జాతీయ డెస్క్: ఫ్రాన్స్లో ప్రభుత్వ విద్యా విధానాలు, ఉపాధ్యాయుల కొరత మరియు శిథిలావస్థకు చేరిన పాఠశాల భవనాలకు వ్యతిరేకంగా విద్యార్థులు చేపట్టిన నిరసనలు తీవ్రరూపం దాల్చాయి. దేశవ్యాప్తంగా ఉద్రిక్త పరిస్థితుల మధ్య గురువారం జరిగిన ఆందోళనల్లో హింస చెలరేగింది. మార్సెయిల్ నగరంలోని విక్టర్ హ్యూగో ఉన్నత పాఠశాలలోకి చొరబడిన దుండగులు హెచ్‌‌టెండర్ (ప్రధానోపాధ్యాయుడు)పై పెట్రోల్ పోసి నిప్పుంటించేందుకు ప్రయత్నించడంతో ఆయన గాయపడ్డారు. అదే నగరంలోని సెయింట్-ఎక్సుపెరీ హైస్కూల్ వద్ద మంటలనుార్పేందుకు వచ్చిన అగ్నిమాపక వాహనాన్ని వందలాది మంది ఆందోళనకారులు అడ్డుకుని, సిబ్బందిని తరిమికొట్టి వాహనానికి నిప్పుపెట్టారు. పశ్చిమ నగరమైన నాంట్సెలోనూ మరో పాఠశాలలో ఇలాంటి ఘటనే చోటుచేసుకుంది.
పాఠశాలల్లో మౌలిక వసతుల కొరత, తరగతి గదుల్లో కిక్కిరిసిన విద్యార్థులు మరియు ఉపాధ్యాయుల కొరతను నిరసిస్తూ గత కొన్ని రోజులుగా ఫ్రాన్స్లో విద్యార్థులు ఉద్యమం చేపడుతున్నారు. ఈ నిరసనలు క్రమంగా ఉద్రిక్తతలకు దారితీస్తుండటంతో దేశవ్యాప్తంగా వందలాది మందిని భద్రతా బలగాలు అదుపులోకి తీసుకున్నాయి. మరోవైపు ప్రభుత్వ ప్రణాళికాబద్ధమైన బడ్జెట్ కోతలు మరియు పబ్లిక్ సెక్టార్ ఉద్యోగుల వేతనాలస్తంభనకు వ్యతిరేకంగా ఉపాధ్యాయులు, సివిల్ సర్వెంట్ కార్మికులు కూడా నిరసన బాటపట్టారు. హింసాత్మక ఘటనలను ప్రభుత్వ వర్గాలు తీవ్రంగా ఖండించాయి. విద్యార్థుల సమస్యలను పరిష్కరించేందుకు చర్చలకు సిద్ధంగా ఉన్నామని అధికారులు ప్రకటిస్తున్నప్పటికీ, పాఠశాలల వద్ద జరుగుతున్న అల్లర్లు దేశంలో తీవ్ర ఆందోళన కలిగిస్తున్నాయి.
