హోర్ముజ్ జలసంధిపై ఇరాన్ పట్టు సడలుతోందా?

సూర్య అంతర్జాతీయ డెస్క్: అంతర్జాతీయ ఇంధన మార్కెట్‌లో అత్యంత కీలకమైన హోర్ముజ్ జలసంధిపై ఇరాన్ ఆధిపత్యం క్రమంగా కోల్పోతున్నట్లు విశ్లేషణలు వెలువడుతున్నాయి. మధ్యప్రాచ్యంలో నెలకొన్న ఉద్రిక్తతల నేపథ్యంలో గల్ఫ్ దేశాలు ప్రత్యామ్నాయ మార్గాలను అన్వేషించడంతో పాటు, క్రూడాయిడ్ ఎగుమతులను మళ్లించడంలో విజయవంతమయ్యాయి. ప్రముఖ కార్గో ట్రాకింగ్ సంస్థ కేప్లర్ (Kpler) గణాంకాల ప్రకారం, మధ్యప్రాచ్య దేశాల నుంచి జరుగుతున్న చమురు ఎగుమతులు మళ్లీ యుద్ధానికి ముందునాటి స్థాయికి చేరుకున్నట్లు స్పష్టమవుతోంది. ఇరాన్ ఆంక్షలు మరియు దాడుల బెదిరింపులు ఉన్నప్పటికీ, వాణిజ్య నౌకలు సురక్షితంగా గమ్యస్థానాలకు చేరుకోవడం గ్లోబల్ ట్రేడింగ్ వర్గాల్లో చర్చనీయాంశమైంది.

హోర్ముజ్ జలసంధి గుండా వెళ్లే మార్గాలపై సంప్రదాయ ఆధిపత్యం ప్రదర్శిస్తున్న టెహ్రాన్ ప్రభుత్వానికి, ఈ ప్రత్యామ్నాయ రవాణా మార్గాలు పెద్ద ఎదురుదెబ్బగా మారాయి. సౌదీ అరేబియా మరియు యునైటెడ్ అరబ్ ఎమిరేట్స్ (యూఏఈ) తమ పైప్‌లైన్ నెట్‌వర్క్‌లను పూర్తిగా వినియోగంలోకి తెస్తూ, జలసంధితో సంబంధం లేకుండా ఎర్రసమద్రం మరియు ఫుజైరా టెర్మినల్స్ ద్వారా చమురు ఎగుమతులను భారీగా పెంచాయి. మరోవైపు అమెరికా నౌకాదళం అమలు చేస్తున్న కఠినమైన దిగ్బంధం కారణంగా ఇరాన్ తన సొంత చమురును కూడా ఎగుమతి చేసుకోలేక ఆర్థికంగా తీవ్ర ఇబ్బందులను ఎదుర్కొంటోంది. ఈ భౌగోళిక రాజకీయ మార్పులు అంతర్జాతీయ చమురు మార్కెట్ స్థిరత్వంపై దీర్ఘకాలిక ప్రభావం చూపనున్నాయని నిపుణులు అంచనా వేస్తున్నారు.