16 ఏళ్ల లోపు పిల్లలకు సోషల్ మీడియా, ఆన్‌లైన్ గేమింగ్ బ్యాన్
సూర్య అంతర్జాతీయ డెస్క్: చిన్న పిల్లల మానసిక ఆరోగ్యాన్ని రక్షించడమే లక్ష్యంగా ఉత్తర ఐరోపా దేశమైన నోర్వే విప్లవాత్మక చట్టాన్ని తీసుకురావడానికి సిద్ధమైంది. 16 ఏళ్ల లోపు పిల్లలకు సోషల్ మీడియా ప్లాట్‌ఫామ్‌లతో పాటు ప్రమాదకరమైన ఆన్‌లైన్ గేమింగ్, చాటింగ్ వెబ్‌సైట్లను నిషేధించే ప్రతిపాదిత చట్టం పరిధిని మరింత విస్తరించనున్నట్లు నోర్వే ప్రభుత్వం అధికారికంగా ప్రకటించింది. పిల్లల భావోద్వేగాలు, మానసిక వికాసంపై ప్రతికూల ప్రభావం చూపుతున్న డిజిటల్ ప్లాట్‌ఫామ్‌ల బారిన పడకుండా కాపాడేందుకే ఈ నిర్ణయం తీసుకున్నట్లు వెల్లడించింది. టిక్‌టాక్, స్నాప్‌చాట్ వంటి ప్రముఖ సోషల్ మీడియా యాప్‌లతో పాటు గేమింగ్ ప్లాట్‌ఫామ్ రోబ్లాక్స్ వంటి వాటిని కూడా ఈ నిషేధం పరిధిలోకి తీసుకువస్తున్నట్లు ప్రభుత్వం స్పష్టం చేసింది.
పిల్లలను లక్ష్యంగా చేసుకుని పనిచేసే అల్గారిథమిక్ రికమండేషన్ సిస్టమ్స్, ప్రకటనలు మరియు వ్యసనపరులుగా మార్చే ఫీచర్లు ఉన్న గేమింగ్ ప్లాట్‌ఫామ్‌ల వల్ల పిల్లల భద్రత ప్రమాదంలో పడుతోందని పిల్లలు, కుటుంబ సంక్షేమ శాఖ మంత్రి లేనె వాగ్‌స్లిడ్ ఆందోళన వ్యక్తం చేశారు. కేవలం గేమింగ్ పేరుతో నడుస్తూ పిల్లలకు హాని కలిగించే ఫీచర్లు కలిగిన సైట్లను కూడా ఈ చట్టం కింద నిరోధిస్తామని ఆమె తెలిపారు. వినియోగదారుల వయస్సును నిర్ధారించేందుకు (ఏజ్ వెరిఫికేషన్) పక్కా డిజిటల్ వ్యవస్థలను ఏర్పాటు చేయాల్సిన పూర్తి బాధ్యత సదరు టెక్నాలజీ కంపెనీలపైనే ఉంటుందని ప్రభుత్వం తేల్చిచెప్పింది. అయితే విద్యాపరమైన సేవలు, సాధారణ మెసేజింగ్ యాప్‌లకు ఈ నిషేధం నుండి మినహాయింపు ఉంటుంది.
ఈ ప్రతిపాదిత బిల్లును నోర్వే ప్రభుత్వం త్వరలోనే తమ పార్లమెంట్‌లో ప్రవేశపెట్టనుంది. గతంలో ఆస్ట్రేలియా దేశం కూడా 16 ఏళ్ల లోపు పిల్లలకు సోషల్ మీడియా నిషేధాన్ని విధిస్తూ చట్టం తీసుకురాగా, యూరోపియన్ యూనియన్ సైతం వయస్సు ఆధారిత నియంత్రణలను పరిశీలిస్తోంది. ఇప్పుడు అదే బాటలో నోర్వే ప్రభుత్వం కూడా కఠిన నిబంధనలను తీసుకువస్తుండటంతో గ్లోబల్ టెక్ దిగ్గజాలపై తీవ్ర ఒత్తిడి పెరుగుతోంది. చిన్నతనంలోనే సోషల్ మీడియా, ఆన్‌లైన్ గేమింగ్ వ్యసనాలకు బానిసలవుతున్న పిల్లలను కాపాడుకోవడానికి ఈ చట్టం ఎంతో దోహదపడుతుందని అక్కడి పౌర సమాజం, వైద్య నిపుణులు హర్షం వ్యక్తం చేస్తున్నారు.
