పులి శివలింగంగా వెలసిన క్షేత్రం.. పుల్లేటికుర్రు వ్యాఘ్రేశ్వర స్వామి ఆలయం

సూర్య భక్తి డెస్క్: తూర్పుగోదావరి ప్రాంతంలోని అంబాజీపేట మండలం పుల్లేటికుర్రు గ్రామం ఆధ్యాత్మికతకు, సంప్రదాయాలకు నిలయంగా భాసిల్లుతోంది. ఇక్కడ కొలువైన శ్రీ వ్యాఘ్రేశ్వర స్వామి క్షేత్రం వెనుక ఆసక్తికరమైన స్థలపురాణం ప్రచారంలో ఉంది.

స్థలపురాణం ప్రకారం..

పూర్వం ఈ ప్రాంతం దట్టమైన అరణ్యంగా ఉండేది. ఆ కాలంలో ఒక బ్రాహ్మణుడు నిత్యం పరమశివుడిని భక్తిశ్రద్ధలతో ఆరాధించేవాడు. ఒకరోజు అరణ్యంలో ఓ పులి ఆయనను తరిమింది. ప్రాణభయంతో ఆయన శివుడిని స్మరిస్తూ దగ్గరలోని మారేడు చెట్టు ఎక్కాడు. పులి చెట్టు కింద కాపుకాసి కూర్చుంది.

దిక్కుతోచని ఆ బ్రాహ్మణుడు మారేడు ఆకులను ఒక్కొక్కటిగా కోసి "ఓం నమః శివాయ" అంటూ పులిపై వేయసాగాడు. కొంతసేపటికి పులి పూర్తిగా ఆకులతో కప్పబడి కదలకుండా ఉండిపోయింది. పులి నిద్రపోయిందని భావించిన ఆయన చెట్టు దిగి, గ్రామానికి వెళ్లి విషయం చెప్పాడు. గ్రామస్థులు కర్రలు, బరిసెలతో అక్కడికి చేరుకున్నారు.

పులి ఎంతకీ కదలకపోవడంతో అనుమానం వచ్చి ఆకులను తొలగించి చూడగా, అక్కడ పులికి బదులుగా స్వయంభూ శివలింగం దర్శనమిచ్చిందని పురాణ కథనం. పులి రూపంలో ప్రత్యక్షమైన శివుడిని "వ్యాఘ్రేశ్వరుడు"గా కొలవడం మొదలైందని, అందుకే ఆ ప్రాంతం వ్యాఘ్రేశ్వరంగా ప్రసిద్ధి చెందిందని చెబుతారు. పులి వేటాడిన ప్రాంతం కావడంతో "పులి వేట ఊరు" అనే పేరు వచ్చిందని, కాలక్రమంలో అదే "పుల్లేటికుర్రు"గా మారిందని స్థానికులు చెబుతారు.

ప్రభల తీర్థం ప్రత్యేకత

ఈ గ్రామం సంక్రాంతి సమయంలో నిర్వహించే ప్రభల తీర్థానికి ప్రసిద్ధి. రాష్ట్రవ్యాప్తంగా గుర్తింపు పొందిన ఈ ఉత్సవాన్ని చూసేందుకు పెద్ద సంఖ్యలో భక్తులు తరలివస్తారు. ఈ ప్రాంతంలో ప్రధానంగా వరి, కొబ్బరి పంటలు సాగవుతాయి.

ఎలా చేరుకోవాలి

పుల్లేటికుర్రు అంబాజీపేట నుంచి సుమారు 5.3 కిలోమీటర్లు, అమలాపురం నుంచి సుమారు 10 కిలోమీటర్ల దూరంలో ఉంది.

గ్రామాల్లో దాగి ఉన్న స్థలపురాణాలు, ఆలయ చరిత్రలను తెలుసుకోవడం, భావితరాలకు అందించడం మన వారసత్వాన్ని కాపాడుకోవడంలో భాగమని స్థానిక భక్తులు అభిప్రాయపడుతున్నారు.

– సూర్య భక్తి డెస్క్