ఎగుమతిదారులకు కస్టమ్స్ పథకాలపై అవగాహన కార్యక్రమం హైదరాబాద్లో ఫియో, ఐసీఐసీఐ బ్యాంక్ సంయుక్త నిర్వహణ
హైదరాబాద్, అక్టోబర్ 9 (సూర్య ప్రతినిధి): అంతర్జాతీయ వాణిజ్యానికి అందుబాటులో ఉన్న కస్టమ్స్ పథకాలు, సౌకర్య చర్యలపై ఫెడరేషన్ ఆఫ్ ఇండియన్ ఎక్స్‌పోర్ట్ ఆర్గనైజేషన్స్ (ఫియో) హైదరాబాద్లో అవగాహన కార్యక్రమం నిర్వహించింది. ఐసీఐసీఐ బ్యాంక్ సహకారంతో శుక్రవారం జరిగిన ఈ ఒక్క రోజు కార్యక్రమానికి “ఎగుమతిదారుల కోసం కస్టమ్స్ పథకాలు: ప్రయోజనాలు, విధానాలు, నిబంధనల పాటింపు” అనే అంశాన్ని ఎంచుకున్నారు.
ఈ కార్యక్రమంలో పథకాల ప్రయోజనాలు, అర్హతలు, విధివిధానాలు, అవసరమైన పత్రాలు, నిబంధనల పాటింపుపై ప్రత్యేకంగా దృష్టి సారించారు. తమకు సరిపోయే కస్టమ్స్ పథకాన్ని గుర్తించడం, దరఖాస్తు ప్రక్రియను అర్థం చేసుకోవడం, అర్హమైన ప్రయోజనాలను పొందడం, ఎగుమతి తర్వాత సక్రమంగా నిబంధనలు పాటించడంపై పాల్గొన్నవారికి అవగాహన కలిగింది. దీనివల్ల లావాదేవీల వ్యయం తగ్గి, ఎగుమతుల్లో పోటీతత్వం పెరుగుతుందని నిర్వాహకులు తెలిపారు.
అడ్వాన్స్ అథరైజేషన్, డ్యూటీ ఫ్రీ ఇంపోర్ట్ అథరైజేషన్, ఈపీసీజీ పథకం, బాండెడ్ తయారీ, వేర్‌హౌసింగ్, బాండ్/ఎల్‌యూటీ కింద ఎగుమతులు, ఏఈఓ, ఈఎంఐ, కస్టమ్స్ సౌకర్యాలు, కస్టమ్స్ నిబంధనల పాటింపు, డిజిటల్ కస్టమ్స్ సేవలు, ఐసీఈగేట్ విధానాలు వంటి కీలక అంశాలపై చర్చించారు.
ఎగుమతిదారులు, తయారీదారులు, చిన్న మధ్య తరహా పరిశ్రమల (ఎంఎస్ఎంఈ) ప్రతినిధులు, పారిశ్రామికవేత్తలు, వాణిజ్య నిపుణులు, ఇతర ఆసక్తిగల వర్గాలు పెద్ద సంఖ్యలో హాజరయ్యారు. కార్యక్రమం చివర్లో జరిగిన ముఖాముఖి సమావేశంలో పాల్గొన్నవారు తమ సమస్యలను వివరించారు. వివిధ పథకాలను ఉపయోగించుకుని ఎగుమతులను పెంచుకోవడం, ప్రపంచ స్థాయిలో స్థిరమైన వ్యాపార సంబంధాలను నిర్మించుకునే అవకాశాలపై చర్చించారు.
హైదరాబాద్ కస్టమ్స్ కమిషనరేట్ అసిస్టెంట్ కమిషనర్ (ఐఆర్ఎస్) డి. శ్రీ నగేష్, హైదరాబాద్ కస్టమ్స్ బ్రోకర్స్ అసోసియేషన్ అధ్యక్షుడు ఎస్. అనిల్ కుమార్, ఐసీఐసీఐ బ్యాంక్ జోనల్ హెడ్ శ్రీనివాస్ తాటికొండ, రీజినల్ హెడ్ సీహెచ్. రాజు, ఫియో తెలంగాణ చాప్టర్ హెడ్ ఆర్. కులకర్ణి కార్యక్రమంలో ప్రసంగించారు.
