యంగ్ టైగర్ ఎన్టీఆర్ విడుదల చేసిన 'ఇట్లు అర్జున' ట్రైలర్.. యూట్యూబ్‌లో ట్రెండింగ్!
సూర్య ఎంటర్‌టైన్‌మెంట్ డెస్క్: టాలీవుడ్‌లో యువ నటుడు అనీష్, మలయాళ ముద్దుగుమ్మ అనస్వర రాజన్ జంటగా నటించిన తాజా చిత్రం ఇట్లు అర్జున. మహేష్ ఉప్పాల దర్శకత్వంలో తెరకెక్కిన ఈ చిత్రాన్ని ప్రముఖ దర్శకుడు వెంకీ కుడుముల నిర్మించగా, అక్కినేని నాగార్జున సమర్పిస్తున్నారు. తాజాగా ఈ సినిమాకి సంబంధించిన అధికారిక ట్రైలర్‌ను యంగ్ టైగర్ జూనియర్ ఎన్టీఆర్ సోషల్ మీడియా వేదికగా విడుదల చేశారు. ఎన్టీఆర్ ఈ ట్రైలర్‌ను లాంచ్ చేయడంతో ఈ చిన్న చిత్రంపై ఒక్కసారిగా సినీ వర్గాల్లో మరియు ప్రేక్షకుల్లో భారీగా అంచనాలు పెరిగిపోయాయి.
ట్రైలర్ పరిశీలిస్తే కథనం ఆద్యంతం ఆసక్తికరంగా సాగినట్లు కనిపిస్తోంది. చిన్నతనం నుంచే మాటలు రాని అర్జున్ అనే యువకుడు ఎదుర్కొనే సమస్యలు, అతనికి ఇరుగుపొరుగున ఉండే కీర్తిపై కలిగే ప్రేమ భావాలు కథకు ప్రధాన బలంగా నిలిచాయి. ఎవరికీ అర్థం కాని అర్జున్ సైగల భాష కీర్తికి మాత్రమే అర్థం కావడం, వీరిద్దరి మధ్య ప్రేమ చిగురించే క్రమంలో అనుకోకుండా ఒక గ్యాంగ్‌స్టర్‌కి సంబంధించిన పెన్ డ్రైవ్ అర్జున్ చేతికి చిక్కడం వంటి పరిణామాలు కథను పలు మలుపులు తిప్పుతాయి. ఆ పెన్ డ్రైవ్ వెనుక ఉన్న రహస్యాలు ఏమిటనే అంశాలు ట్రైలర్‌లో ఎంతో ఉత్కంఠను రేకెత్తించాయి.
ఈ చిత్రంలో యాక్షన్, కామెడీ మరియు లవ్ ఎలిమెంట్స్ సమపాళ్లలో కుదిరినట్లు చిత్ర విజువల్స్ స్పష్టం చేస్తున్నాయి. మ్యూజిక్ సెన్సేషన్ ఎస్.ఎస్. తమన్ అందించిన నేపథ్య సంగీతం ట్రైలర్‌కు ప్రధాన ఆకర్షణగా నిలవగా, రాజా మహాదేవన్ సినిమాటోగ్రఫీ దృశ్యాలను ఎంతో సమృద్ధిగా ఆవిష్కరించింది. నిర్మాణ విలువల్లో ఎక్కడా కాంప్రమైజ్ కాకుండా తెరకెక్కించిన ఈ చిత్రం నవంబర్ 13న ప్రపంచవ్యాప్తంగా థియేటర్లలో విడుదల కానుంది. ఎన్టీఆర్ మద్దతుతో మరింత ప్రచారం పొందిన ఈ చిత్రం బాక్సాఫీస్ వద్ద విజయం సాధిస్తుందని చిత్ర యూనిట్ ధీమా వ్యక్తం చేస్తోంది.
