త్రివిక్రమ్ సినిమాల కంటే ఇది పూర్తిగా భిన్నం: ఆదర్శ కుటుంబంపై శ్రీనిధి శెట్టి ఆసక్తికర వ్యాఖ్యలు

సూర్య ఎంటర్‌టైన్‌మెంట్ డెస్క్: విక్టరీ వెంకటేష్ మరియు మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో వస్తున్న మోస్ట్ ఎవైటెడ్ మూవీ ఆదర్శ కుటుంబం హౌస్ నెం 47 సినిమాపై సర్వత్రా భారీ అంచనాలు నెలకొన్నాయి. హారిక అండ్ హాసిని క్రియేషన్స్ పతాకంపై ఎస్. రాధాకృష్ణ నిర్మిస్తున్న ఈ చిత్రంలో టాలెంటెడ్ హీరోయిన్ శ్రీనిధి శెట్టి కథానాయికగా నటిస్తున్నారు. దీపావళి కానుకగా అక్టోబర్ 30న ప్రపంచవ్యాప్తంగా థియేటర్లలో గ్రాండ్‌గా విడుదల కానున్న ఈ సినిమాకు సంబంధించి ప్రచార కార్యక్రమాలు జోరుగా సాగుతున్నాయి. ఈ నేపథ్యంలో తాజాగా మీడియా ముఖంగా సినిమా విశేషాలను పంచుకున్న కథానాయిక శ్రీనిధి శెట్టి, త్రివిక్రమ్ దర్శకత్వ శైలి గురించి, తన పాత్ర తాలూకు అనుభవాలను ప్రేక్షకులతో పంచుకున్నారు.

సుమారు ఇరవై ఏళ్ల తర్వాత వెంకటేష్, త్రివిక్రమ్ కలయికలో వస్తున్న ఈ ప్రాజెక్ట్ త్రివిక్రమ్ ఇప్పటివరకు చేసిన సినిమాలన్నింటికీ పూర్తి భిన్నంగా ఉంటుందని శ్రీనిధి శెట్టి తెలిపారు. ఇది ఒక క్రైమ్ మరియు డార్క్ కామెడీ జానర్ చిత్రమని, తాను మొదటిసారిగా పూర్తిస్థాయి కామెడీ నేపథ్యం ఉన్న పాత్రలో కనిపించబోతున్నానని ఆమె వెల్లడించారు. చిత్రంలో తాను చిట్ ఫండ్‌లో డబ్బులు పోగొట్టుకుని అప్పులపాలయ్యే వైవిధ్యమైన పాత్రను పోషించానని, ఇలాంటి విభిన్నమైన పాత్ర చేయడం తనకు ఎంతో సంతృప్తినిచ్చిందని పేర్కొన్నారు. త్రివిక్రమ్ రాసిన పదునైన సంభాషణలు, ముఖ్యంగా ట్రైలర్‌లో ఆకట్టుకున్న డైలాగులు సినిమాకే హైలైట్‌గా నిలుస్తాయని ఆమె ధీమా వ్యక్తం చేశారు.

అత్యంత అనుభవజ్ఞులైన వెంకటేష్‌తో కలిసి నటించడం, ఆయన కామెడీ టైమింగ్‌ను మ్యాచ్ చేయడం అంత తేలిక కాకపోయినా, దర్శకుడు త్రివిక్రమ్ సూచనలతో తన వంతుగా సహజంగా నటించే ప్రయత్నం చేశానని శ్రీనిధి తెలిపారు. సినిమా అవుట్‌పుట్‌ను మరింత మెరుగుపరిచేందుకే విడుదల తేదీని అక్టోబర్ 9 నుంచి అక్టోబర్ 30కి మార్చామని, ఈ అదనపు సమయం సినిమాను మరింత అందంగా తీర్చిదిద్దడానికి దోహదపడిందని నిర్మాత నాగవంశీ చెప్పిన మాటలను ఆమె గుర్తుచేశారు. ఈ సినిమా షూటింగ్ ప్రయాణం తనకు ఎంతో సంతృప్తినిచ్చిందని, ఇటీవలే సినిమా చూసిన తాను చాలా ఎంజాయ్ చేశానని తెలిపారు.

దర్శకుడు త్రివిక్రమ్ గొప్ప వ్యక్తిత్వం గురించి ప్రశంసల జల్లు కురిపించిన శ్రీనిధి శెట్టి, సెట్స్‌లో ఆయన కల్పించే ప్రశాంత వాతావరణం నటీనటులకు ఎంతో సౌకర్యంగా ఉంటుందని చెప్పారు. హారిక అండ్ హాసిని క్రియేషన్స్ లాంటి ప్రతిష్టాత్మక బ్యానర్‌లో పనిచేయడం తన అదృష్టంగా భావిస్తున్నానని అన్నారు. కామెడీతో పాటు ప్రేక్షకులను అలరించే అన్ని హంగులతో రూపుదిద్దుకున్న ఈ చిత్రం బాక్సాఫీస్ వద్ద ఘన విజయం సాధిస్తుందని చిత్ర యూనిట్ గట్టి నమ్మకంతో ఉంది.

Also Read: రీ సర్వేలో మూడు గ్రామాల సరిహద్దుల నిర్ధారణ