సెప్టెంబర్ 18న ‘సీక్రెట్ సోల్జర్’ విడుదల: ప్రమోషన్లలో ముచ్చటించిన కథానాయకులు నిహాల్, సూర్య శ్రీనివాస్
సూర్యా న్యూస్ డెస్క్
అక్కి విశ్వనాథ్ రెడ్డి దర్శకత్వంలో రూపుదిద్దుకున్న నూతన స్పై డ్రామా చిత్రం ‘సీక్రెట్ సోల్జర్’ సెప్టెంబర్ 18న ప్రేక్షకుల ముందుకు రానుంది. ఈ సందర్భంగా చిత్ర కథానాయకులు నిహాల్ కోదాటి, సూర్య శ్రీనివాస్ విలేకరుల సమావేశంలో సినిమా విశేషాలను, సెన్సార్ అనుభవాలను పంచుకున్నారు.
మూన్ లైట్ డ్రీమ్స్ బ్యానర్పై అక్కి విశ్వనాథ్ రెడ్డి దర్శకత్వంలో తెరకెక్కిన వినూత్న స్పై డ్రామా చిత్రం ‘సీక్రెట్ సోల్జర్’ సెప్టెంబర్ 18న విడుదలకానుంది. నిహాల్ కోదాటి, సూర్య శ్రీనివాస్ కథానాయకులుగా నడుస్తున్న ఈ సినిమాలో కమల్ కామరాజు, రఘుబాబు, రంగస్థలం మహేష్, శ్రీనివాస్ వడ్లమాని, శ్రీకాంత్ అయ్యంగార్ ఇతర ముఖ్య పాత్రలు పోషించారు. ప్రమోషనల్ కంటెంట్ ద్వారా ఇప్పటికే ఆకట్టుకున్న ఈ చిత్రం త్వరలోనే ప్రేక్షకులను పలకరించనున్న నేపథ్యంలో, హీరోలు నిహాల్, సూర్య శ్రీనివాస్ మీడియా సమావేశంలో చిత్ర విశేషాలను వెల్లడించారు.
తొలుత ఈ చిత్రానికి ‘చైనా పీస్’ అనే శీర్షిక నిర్ణయించి టీజర్, పాటలు విడుదల చేశామని, అయితే మార్చి నెలలో సెన్సార్ ప్రక్రియకు వెళ్లిన సమయంలో కేంద్ర విదేశాంగ మంత్రిత్వ శాఖ, సెన్సార్ రివ్యూ కమిటీ అభ్యంతరాల మేరకు టైటిల్ను ‘సీక్రెట్ సోల్జర్’గా మార్చినట్లు నటులు తెలిపారు. దాదాపు ఎనిమిది నెలల పాటు సెన్సార్ పరిశీలనలో ఉన్నప్పటికీ, తాము అనుకున్న మౌలిక కథాంశంలో ఎలాంటి మార్పులు లేవని, దృశ్యపరంగా చిన్నచిన్న మార్పులతో దర్శకుడు విశ్వనాథ్ రాజీ పడకుండా క్వాలిటీతో రూపొందించారని స్పష్టం చేశారు.
నెల్లూరు ప్రాంతానికి చెందిన ఇద్దరు సాధారణ యువకుల జీవితాలు దేశభద్రతకు సంబంధించిన ఒక ముప్పుతో ఎలా ముడిపడ్డాయి, ఆ సమస్యను వారు ఎలా అధిగమించారనే పాయింట్తో ఈ కథ నడుస్తుంది. స్నేహం, దేశభక్తి అనే అంశాల సమాహారంగా సహజ సిద్ధమైన యాక్షన్, వినోదం, వీఎఫ్ఎక్స్ నాణ్యతతో ఈ చిత్రం ఉంటుందని తెలిపారు. ఈ చిత్రంలో గూఢచారుల జీవితాలను మితిమీరిన నాటకీయత లేకుండా చాలా సహజంగా చూపించినట్లు చెప్పారు. ప్రత్యేకంగా నిర్వహించిన ప్రీవియో షోలలో డిస్ట్రిబ్యూటర్ల నుంచి, విభిన్న వర్గాల ప్రేక్షకుల నుంచి ప్రశంసలు అందాయని పేర్కొన్నారు.
తమ రాబోయే ప్రాజెక్టుల గురించి మాట్లాడుతూ, నిహాల్ కోదాటి ఈటీవీ, సాయి రాజేష్ బ్యానర్లలో చిత్రాలు చేస్తున్నట్లు ప్రకటించగా, సూర్య శ్రీనివాస్ ‘అంతా రాములోరు చూసుకుంటారు’ చిత్రంతో పాటు ఓ ద్విభాషా చిత్రంలో నటిస్తున్నట్లు వివరించారు.
