లేడీ సూపర్స్టార్ నయనతార రికార్డ్: ‘మూకుత్తి అమ్మన్ 2’ కోసం ఏకంగా 60 అడుగుల భారీ కటౌట్
సూర్య ఎంటర్‌టైన్‌మెంట్ డెస్క్: సౌత్ ఇండియన్ సినిమా రంగాన్ని తన అద్భుతమైన నటనతో ఏలుతున్న లేడీ సూపర్స్టార్ నయనతార మరో అరుదైన మైలురాయిని అధిగమించారు. ఆమె ప్రధాన పాత్రలో నటిస్తున్న తాజా సంచలన చిత్రం ‘మూకుత్తి అమ్మన్ 2’ (తెలుగులో ‘మహా శక్తి’) సినిమాకు సంబంధించి అపూర్వ ఘట్టం చోటుచేసుకుంది. తమిళనాడులోని వేల్స్ థియేటర్స్ వద్ద నయనతారకు ఏకంగా 60 అడుగుల భారీ కటౌట్‌ను ఏర్పాటు చేయడం సినీ వర్గాల్లో హాట్ టాపిక్‌గా మారింది. సాధారణంగా స్టార్ హీరోలకు మాత్రమే ఇలాంటి భారీ కటౌట్లు ఏర్పాటు చేస్తుండగా, సౌత్ సినీ చరిత్రలోనే ఒక కథానాయికకు ఇంతటి భారీ ఎత్తులో కటౌట్ ఏర్పాటు చేయడం ఇదే మొదటిసారి కావడం విశేషం.
ప్రముఖ దర్శకుడు సుందర్ సి దర్శకత్వంలో వేల్స్ ఫిల్మ్ ఇంటర్నేషనల్ బ్యానర్‌పై నిర్మాత ఇషారి కె. గణేష్ అత్యంత ప్రతిష్టాత్మకంగా ఈ చిత్రాన్ని నిర్మించారు. సుమారు రూ. 100 కోట్ల భారీ బడ్జెట్‌తో తెరకెక్కిన ఈ చిత్రంలో నయనతార ద్విపాత్రాభినయం చేస్తుండగా, అమ్మవారి పాత్ర కోసం ఆమె ఎంతో భక్తిశ్రద్ధలతో దాదాపు నెల రోజుల పాటు కఠిన ఉపవాస దీక్ష ఆచరించినట్లు మేకర్స్ తెలిపారు. ఈ ప్రతిష్టాత్మక సినిమా దీపావళి కానుకగా నవంబర్ 6న ప్రపంచవ్యాప్తంగా గ్రాండ్‌గా థియేటర్లలో విడుదల కానుంది.
ఇదివరకు వచ్చిన ‘మూకుత్తి అమ్మన్’ చిత్రానికి సీక్వెల్‌గా వస్తున్నప్పటికీ, ఇది పూర్తిగా సరికొత్త కథాంశంతో సాగనున్న ఫాంటసీ డివోషనల్ ఎంటర్‌టైనర్ అని చిత్ర బృందం స్పష్టం చేసింది. తెలుగు, హిందీ భాషల్లో ఈ చిత్రాన్ని ‘మహా శక్తి’ అనే పవర్‌ఫుల్ టైటిల్‌తో విడుదల చేస్తున్నారు. ఈ చిత్రంలో రెజీనా కసాండ్రా, కన్నడ నటుడు దునియా విజయ్ శక్తిమంతమైన విలన్ పాత్రల్లో నటిస్తున్నారు. ప్రస్తుతం సినిమా ప్రమోషన్ కార్యక్రమాలు జోరుగా సాగుతుండగా, లేడీ సూపర్స్టార్ క్రేజ్ చూసి అభిమానులు తెగ ఆనందం వ్యక్తం చేస్తున్నారు.
Also Read: గోపీచంద్ ‘సింగ’ మూవీ షూటింగ్ అప్‌డేట్: 50 శాతం పూర్తి చేసుకున్న యాక్షన్ ఎంటర్‌టైనర్
