‘ఇట్లు అర్జున’ సినిమా విడుదల మరోసారి వాయిదా: నవంబర్‌లో వచ్చే అవకాశం
సూర్య ఎంటర్‌టైన్‌మెంట్ డెస్క్: టాలీవుడ్ యంగ్ అండ్ టాలెంటెడ్ హీరో అనీష్, మలయాళ భామ అనస్వర రాజన్ జంటగా నటిస్తున్న చిత్రం ‘ఇట్లు అర్జున’. నూతన దర్శకుడు మహేష్ ఉప్పల తెరకెక్కిస్తున్న ఈ చిత్రాన్ని వాట్ నెక్స్ట్ ఎంటర్‌టైన్‌మెంట్స్ బ్యానర్‌పై నిర్మిస్తుండగా, ప్రముఖ నిర్మాణ సంస్థ అన్నపూర్ణ స్టూడియోస్ బ్యానర్‌పై అక్కినేని నాగార్జున సమర్పిస్తున్నారు. ఇప్పటికే ఈ సినిమా నుండి విడుదలైన ప్రచార చిత్రాలు, పాటలు, ట్రైలర్ ప్రేక్షకులను విశేషంగా ఆకట్టుకోవడంతో చిత్రంపై మంచి అంచనాలు నెలకొన్నాయి. గతంలో పలుమార్లు వాయిదా పడిన ఈ సినిమాను అక్టోబర్ 30న ప్రేక్షకుల ముందుకు తీసుకురావాలని మేకర్స్ నిర్ణయించారు.
తాజా సమాచారం ప్రకారం అక్టోబర్ 30న కూడా ‘ఇట్లు అర్జున’ చిత్రం థియేటర్లలోకి రావడం లేదని సినీ వర్గాల నుంచి వార్తలు వస్తున్నాయి. ఈ సినిమాకు సంబంధించిన పోస్ట్ ప్రొడక్షన్ పనులు ఇంకా పూర్తి కాకపోవడంతో పాటు విజువల్ ఎఫెక్ట్స్, ప్యాచ్ వర్క్ పనుల కోసం మరింత సమయం అవసరమవుతోందని తెలుస్తోంది. అవుట్‌పుట్ విషయంలో ఎలాంటి రాజీ పడకూడదనే ఉద్దేశంతోనే నిర్మాతలు విడుదల తేదీని మరికొంత కాలం ముందుకు జరపాలని నిర్ణయించుకున్నట్లు సమాచారం. దీనికి తోడు అదే సమయానికి మరికొన్ని చిత్రాలు పోటీలో ఉండటం కూడా వాయిదాకు మరొక కారణంగా ప్రచారం జరుగుతోంది.
సినిమాకు సంబంధించిన పనులన్నీ పూర్తి చేసుకుని నవంబర్ 13న ఈ చిత్రాన్ని ప్రపంచవ్యాప్తంగా గ్రాండ్‌గా విడుదల చేసేందుకు మేకర్స్ సన్నాహాలు చేస్తున్నట్లు తెలుస్తోంది. సరైన కంటెంట్, బలమైన కథాంశంతో వస్తున్న ఈ చిత్రం ఆలస్యంగా వచ్చినా ప్రేక్షకులను తప్పకుండా అలరిస్తుందని చిత్ర బృందం భావిస్తోంది. అన్నపూర్ణ స్టూడియోస్ సమర్పణలో వస్తున్న ఈ ప్రాజెక్ట్ నటుడు అనీష్ కెరీర్‌లో మంచి మైలురాయిగా నిలుస్తుందని సినీ ప్రియులు ఆశిస్తున్నారు. కొత్త విడుదల తేదీపై చిత్ర యూనిట్ త్వరలోనే అధికారిక ప్రకటన విడుదల చేయనుంది.
Also Read: ‘రామాయణ’లో సరికొత్త సాంకేతిక విప్లవం: బ్రహ్మ ఏఐ టెక్నాలజీతో అద్భుతమైన లిప్-సింక్
