నవంబర్ 21న హైదరాబాద్లో ప్రముఖ గాయని కేఎస్ చిత్ర చిత్రామృతం 3.0 మ్యూజికల్ కాన్సర్ట్
సూర్య ఎంటర్టైన్మెంట్ డెస్క్: తన మధురమైన గాత్రంతో దశాబ్దాలుగా సంగీత ప్రియులను అలరిస్తున్న ప్రముఖ నేపథ్య గాయని కేఎస్ చిత్ర మరోసారి నగరవాసులను మంత్రముగ్ధులను చేయడానికి సిద్ధమయ్యారు. ఆమె ప్రతిష్ఠాత్మక సంగీత కచేరీ చిత్రామృతం 3.0 వచ్చే నవంబర్ 21వ తేదీన హైదరాబాద్లోని నెక్సస్ మాల్ గ్రౌండ్స్లో అత్యంత వైభవంగా నిర్వహించనున్నారు. జోరా మరియు ఎన్ చాట్ మీడియా సంయుక్త ఆధ్వర్యంలో జరగనున్న ఈ వేడుక భాగ్యనగరంలో ఇప్పటివరకు జరగని రీతిలో అతిపెద్ద మ్యూజికల్ కాన్సర్ట్గా నిలవనుందని నిర్వాహకులు వెల్లడించారు. ఈ అద్భుతమైన సంగీత కచేరీని ప్రత్యక్షంగా ఆస్వాదించేందుకు సుమారు పది వేల మందికి పైగా ప్రేక్షకులు హాజరవుతారని అంచనా వేస్తున్నారు.
ఈ కచేరీకి సంబంధించిన వివరాలను వెల్లడించేందుకు సోమవారం హైదరాబాద్లో ప్రత్యేకంగా ఏర్పాటు చేసిన ప్రెస్మీట్లో కేఎస్ చిత్ర స్వయంగా పాల్గొని సందడి చేశారు. ఈ సందర్భంగా తన అద్భుతమైన సంగీత ప్రయాణం, హైదరాబాద్ ప్రేక్షకులతో ఉన్న విడదీయరాని అనుబంధం గురించి ఆమె మీడియాతో పంచుకున్నారు. సమావేశంలో భాగంగా పలువురు యువ గాయకులు చిత్ర గారి అపురూపమైన పాటలను ఆలపించి ఆమెకు ఘనంగా సంగీత నివాళి అర్పించారు. చిత్ర గారి మధుర స్వరంతో ముడిపడిన మరువలేని పాటలను లైవ్లో వినే అవకాశం కలుగుతుండటంతో అభిమానుల్లో ఉత్సాహం వ్యక్తమవుతోంది.
ఈ భారీ సంగీత వేడుకను విజయవంతం చేసేందుకు నిర్వాహకులు వినయ్ రెడ్డి, సంజయ్ రెడ్డి అన్ని ఏర్పాట్లు పూర్తి చేస్తున్నారు. హైదరాబాద్తో పాటు చుట్టుపక్కల ప్రాంతాల నుంచి కూడా పెద్ద సంఖ్యలో సంగీత ప్రేమికులు తరలివస్తారని భావిస్తున్నారు. ఈ కచేరీకి సంబంధించిన టికెట్లు ఇప్పటికే తుంపన్ వెబ్సైట్లో అందుబాటులో ఉంచినట్లు నిర్వాహకులు తెలిపారు. ఎన్నో తరాల శ్రోతలను తన గళంతో అలరించిన చిత్ర గారి మధుర జ్ఞాపకాలను మరోసారి నెమరువేసుకునేలా సాగే ఈ చిత్రామృతం 3.0 సంగీత సాయంత్రం ప్రేక్షకులకు అరుదైన అనుభూతిని పంచడం ఖాయం.
