సబ్‌స్క్రిప్షన్ ఉచ్చుల్లో ఓటీటీ ప్లాట్‌ఫారమ్‌లు: యూజర్ల అసహనం.. కఠిన చర్యలకు డిమాండ్, లోకల్‌సర్కిల్స్ సర్వేలో వెల్లడి!
సూర్య టెక్ & కన్స్యూమర్ డెస్క్, న్యూఢిల్లీ: ప్రముఖ ఓటీటీ స్ట్రీమింగ్ దిగ్గజాలు జీ5 , అమెజాన్ ప్రైమ్, జియోహాట్‌స్టార్ వంటి ప్లాట్‌ఫారమ్‌లు వినియోగదారులను ‘సబ్‌స్క్రిప్షన్ ట్రాప్స్’ మరియు దాగి ఉన్న రద్దు నిబంధనల ద్వారా మోసగిస్తున్నాయని తాజా సర్వేలో తీవ్ర ఆరోపణలు వ్యక్తమయ్యాయి. ప్రముఖ కమ్యూనిటీ ఆధారిత సర్వే సంస్థ 'లోకల్‌సర్కిల్స్' దేశవ్యాప్తంగా నిర్వహించిన సర్వేలో మెజారిటీ వినియోగదారులు ఓటీటీ సంస్థల తీరుపై తీవ్ర ఆగ్రహం వ్యక్తం చేశారు. కేంద్ర వినియోగదారుల వ్యవహారాల మంత్రిత్వ శాఖ ఈ మోసపూరిత పద్ధతులపై తక్షణమే కఠిన చర్యలు తీసుకోవాలని డిమాండ్ చేశారు.
డార్క్ ప్యాటర్న్స్ – సులభంగా జాయినింగ్.. రద్దు చేసుకోవడం కష్టం:
సర్వే ఫలితాల ప్రకారం, అనేక ఓటీటీ ప్లాట్‌ఫారమ్‌లు చందాదారులను ఆకర్షించేందుకు సులభంగా ఆటో-డెబిట్ (ఆటో-రెన్యూవల్) సౌకర్యాన్ని కల్పిస్తున్నప్పటికీ, సబ్‌స్క్రిప్షన్‌ను రద్దు చేసుకునే ఆప్షన్లను సెట్టింగ్స్‌లో లోతుగా దాచిపెడుతున్నాయని వినియోగదారులు వాపోయారు.
రద్దు ప్రక్రియలో ఇబ్బందులు: చాలా సందర్భాల్లో సబ్‌స్క్రిప్షన్ క్యాన్సిల్ చేసేందుకు ప్రయత్నిస్తే బహుళ పేజీల వార్నింగ్‌లు, క్లిష్టమైన స్టెప్స్ చూపించడం ద్వారా యూజర్లను నిరుత్సాహపరుస్తున్నారని సర్వేలో పాల్గొన్న 70 శాతానికి పైగా ప్రజలు ఆరోపించారు.
ముందస్తు సమాచారం లేని డెబిట్లు: ఉచిత ట్రయల్ పూర్తయిన తర్వాత లేదా ప్లాన్ రెన్యూవల్ తేదీ సమీపించినప్పుడు ముందస్తు నోటిఫికేషన్లు సరిగ్గా ఇవ్వకుండానే ఖాతాల నుంచి నేరుగా డబ్బులు కట్ చేసుకుంటున్నారని పేర్కొన్నారు.
ప్రభుత్వ నిబంధనల ఉల్లంఘన: కేంద్ర వినియోగదారుల పరిరక్షణ ప్రాధికార సంస్థ నిషేధించిన ‘డార్క్ ప్యాటర్న్స్’ మార్గదర్శకాలను ఈ స్ట్రీమింగ్ దిగ్గజాలు యథేచ్ఛగా ఉల్లంఘిస్తున్నాయని సర్వే స్పష్టం చేసింది.
కఠిన నియంత్రణ వ్యవస్థకు డిమాండ్:
బ్యాంకింగ్ తరహాలోనే ఓటీటీ సబ్‌స్క్రిప్షన్ల రద్దు ప్రక్రియ కూడా ఒకే క్లిక్‌తో పూర్తయ్యేలా స్పష్టమైన నిబంధనలు తీసుకురావాలని వినియోగదారులు డిమాండ్ చేస్తున్నారు. వినియోగదారులను తప్పుదోవ పట్టించేలా డిజైన్ చేసిన యాప్ ఇంటర్‌ఫేస్‌లను సవరించాలని మరియు అక్రమంగా డబ్బులు కట్ చేసిన ఖాతాదారులకు వెంటనే రీఫండ్ అందించేలా వ్యవస్థను రూపొందించాలని లోకల్‌సర్కిల్స్ నివేదిక ద్వారా కేంద్ర ప్రభుత్వానికి విజ్ఞప్తి చేశారు.
