బ్రిటన్-ఈయూ కార్బన్ మార్కెట్ల అనుసంధానం..?
సూర్య బిజినెస్ డెస్క్: బ్రిటన్ మరియు యూరోపియన్ యూనియన్ (ఈయూ) తమ కార్బన్ ఉద్గారాల ట్రేడింగ్ వ్యవస్థలను అనుసంధానించేందుకు సూత్రప్రాయంగా అంగీకరించిన నేపథ్యంలో, ఈ మార్కెట్లు ఎలా పనిచేస్తాయి మరియు వాటిని కలపడం వల్ల కలిగే ప్రయోజనాలు, సవాళ్లపై ఆసక్తి నెలకొంది. బ్రెగ్జిట్కు ముందు బ్రిటన్ ఈయూ ఎమిషన్స్ ట్రేడింగ్ సిస్టమ్ (ఈటీఎస్) పరిధిలో ఉండగా, 2021లో సొంత కార్బన్ మార్కెట్ను ఏర్పాటు చేసుకుంది. కర్బన ఉద్గారాలపై పరిమితులు విధించి, పెద్ద పరిశ్రమలు, విద్యుత్ ఉత్పత్తి సంస్థలు తమ ఉద్గారాలకు అనుగుణంగా కార్బన్ పర్మిట్లు లేదా అలవెన్సులను కొనుగోలు చేసి వర్తకం చేసుకునే విధానమే ఈ కార్బన్ మార్కెట్లు. ప్రస్తుతం ఈ రెండు మార్కెట్లు వేర్వేరుగా పనిచేస్తున్నందున, ఒక మార్కెట్లో కొనుగోలు చేసిన అలవెన్సులను మరొక మార్కెట్లో వినియోగించుకునే వీలులేదు.
ఈ రెండు మార్కెట్లను అనుసంధానించడం ద్వారా ఉద్గారాల ట్రేడింగ్ వ్యవస్థలు పరస్పరం గుర్తింపు పొందుతాయి. ముఖ్యంగా ఈయూ అమలు చేస్తున్న కార్బన్ బోర్డర్ అడ్జస్ట్మెంట్ మెకానిజం (సీబీఏఎం) మరియు బ్రిటన్ 2027 జనవరి నుంచి ప్రవేశపెట్టనున్న సొంత కార్బన్ సరిహద్దు పన్నుల నుంచి ఇరుపక్షాల ఎగుమతులకు మినహాయింపు లభించే అవకాశం ఉంది. ఉక్కు, అల్యూమినియం, సిమెంట్, ఎరువులు, హైడ్రోజన్ వంటి రంగాల ఉత్పత్తులను ఈయూకు ఎగుమతి చేసే బ్రిటన్ సంస్థలపై ఇప్పటికే విధిస్తున్న కార్బన్ పన్నుల భారం తగ్గుతుందని, దీనివల్ల బ్రిటన్ పరిశ్రమలకు ఏటా వందల మిలియన్ పౌండ్ల మేర ఆదా అవుతుందని పరిశ్రమ వర్గాలు అంచనా వేస్తున్నాయి.
ప్రస్తుతం ఈయూ కార్బన్ కాంట్రాక్టు ధర మెట్రిక్ టన్నుకు సుమారు 82 యూరోల వద్ద ఉండగా, బ్రిటన్ మార్కెట్లో ఇది సుమారు 60 పౌండ్ల స్థాయిలో ఉంది. మార్కెట్ల అనుసంధానం అమల్లోకి వస్తే రెండు మార్కెట్లలో కర్బన ధరలు దాదాపు సమాన స్థాయికి చేరే అవకాశం ఉంది. బ్రిటన్ కార్బన్ ధరలు తక్కువగా ఉన్నందున, అనుసంధానం తర్వాత అక్కడ కార్బన్ ధరలు స్వల్పంగా పెరిగే అవకాశం ఉందని, ఇది విద్యుత్ మరియు కొన్ని ఉత్పత్తుల ధరలపై ప్రభావం చూపవచ్చని విశ్లేషకులు చెబుతున్నారు. మరోవైపు, విశాలమైన మార్కెట్ ఏర్పడటం వల్ల ధరలలో స్థిరత్వం పెరిగి దీర్ఘకాలంలో పెట్టుబడులకు ఊతం లభిస్తుందని మద్దతుదారులు భావిస్తున్నారు.
అయితే ఈయూ నిబంధనలతో మరింత సన్నిహితంగా సమన్వయం చేసుకోవాల్సి రావడం బ్రిటన్ రాజకీయాల్లో సున్నితమైన అంశంగా ఉంది. కొన్ని రంగాల్లో నిబంధనలు, రాయితీల విషయంలో భిన్నమైన విధానాలు ఉన్నందున, వాటిని ఎలా సమన్వయం చేస్తారనే దానిపై చర్చలు కొనసాగుతున్నాయి. ఇరుపక్షాల చట్టపరమైన, సాంకేతిక ఆమోద ప్రక్రియలు పూర్తయిన తర్వాతే మార్కెట్ల అనుసంధానం పూర్తిస్థాయిలో అమల్లోకి రానుంది.