విజయదశమి సందర్భంగా అడ్డరోడ్డు దుర్గాదేవి కి హోంమంత్రి అనిత ప్రత్యేక పూజలు
రాష్ట్రం సుభిక్షంగా వుండాలని, ప్రజలు ఆయురారోగ్యాలతో వర్ధిల్లాలనీ…
యస్.రాయవరం మండలం అడ్డురోడ్డు జంక్షన్ లోని శ్రీ దుర్గాదేవి అమ్మవారిని హోం మంత్రి వంగలపూడి అనిత కుటుంబ సమేతంగా మంగళవారం దర్శించుకున్నారు. విజయదశమి సందర్భంగా హోం మంత్రి అనిత ప్రత్యేక పూజలు నిర్వహించారు. దుర్గమ్మ అమ్మవారికి భక్తిశ్రద్ధలతో పూజలు చేశారు. పండుగ సందర్భంగా వాహన పూజ, ఆయుధ పూజ నిర్వహించిన అనంతరం అమ్మవారి ఆశీస్సులు పొందారు.
చెడుపై మంచి సాధించిన విజయమే…
ఈ సందర్భంగా హోం మంత్రి అనిత మాట్లాడుతూ, చెడుపై మంచి సాధించిన విజయానికి ప్రతీక విజయదశమి అని పేర్కొన్నారు. జగన్మాత శ్రీ దుర్గమ్మ తల్లి ఆశీస్సులు రాష్ట్ర ప్రజలందరిపై ఉండాలని, రాష్ట్రం సుభిక్షంగా ఉండాలని, ప్రజలంతా ఆయురారోగ్యాలు, సుఖసంతోషాలతో వర్ధిల్లాలని అమ్మవారిని ప్రార్థించారు. దర్శనం అనంతరం ఆలయ నిర్వాహకులు హోం మంత్రి అనితను ఘనంగా సత్కరించారు.
అంతకుముందు నక్కపల్లి క్యాంపు కార్యాలయంలో హోం మంత్రి అనిత నిర్వహించిన పూజా కార్యక్రమాల్లో పోలీసులు, క్యాంపు కార్యాలయ సిబ్బంది, నాయకులు పాల్గొన్నారు. ప్రత్యేక పూజలు నిర్వహించి అమ్మవారి ఆశీస్సులు, అండదండలు అందరిపై ఉండాలని వేదపండితులు దివ్య ఆశీస్సులు పొందారు.
