వైయస్సార్ కాంగ్రెస్ పార్టీ తరఫున చింతకాయల అనిత చైర్మన్ అభ్యర్థిగా నామినేషన్

నర్సీపట్నం అక్టోబర్ 18 మేజర్ న్యూస్:
నర్సీపట్నం మున్సిపాలిటీ వైయస్సార్ కాంగ్రెస్ పార్టీ అభ్యర్థిగా చింతకాయల అనిత నామినేషన్ కార్యక్రమం అట్టహాసంగా జరిగింది. బ్యాంక్ కాలనీలో సన్యాసిపాత్రుడు ఇంటి వద్ద నుండి మాజీ ఎమ్మెల్యే ఉమాశంకర్ గణేష్, పార్టీ నాయకులు, కార్యకర్తలతో ర్యాలీగా బయలుదేరారు. ఉమాశంకర్ గణేష్ మద్దతుతో పోటి చేస్తున్న ఛైర్ పర్సన్ అనితతో పాటు 40 వార్డుల అభ్యర్థులు ఊరేగింపుగా ర్యాలీలో పాల్గొన్నారు. డప్పులు మోత తో పండుగ పోతువరణం నెలకొంది. పెదబొడ్డేపల్లి ఆంజనేయస్వామి ఆలయంలో ప్రత్యేక పూజలలో పాల్గొన్న అనంతరం మున్సిపల్ కార్యాలయానికి చేరుకున్నారు. ఎలక్షన్ రిటర్నింగ్ అధికారి వి.వి.రమణకు నామినేషన్ పత్రాలను అందజేశారు. అనంతరం మాజీ ఎమ్మెల్యే గణేష్ మాట్లాడుతూ పరిపాలనపై పట్టున్న చింతకాయల అనితను అత్యధిక మెజారిటీ తో గెలిపించాలని కోరారు. ఇప్పటికే సూపర్ 6 హమీలతో ప్రజలను మోసం చేశారని అన్నారు. చింతకాయల అనిత మాట్లాడుతూ మున్సిపల్ సమస్యల పట్ల తనకు అవగాహన ఉందని, తనను గెలిపిస్తే మౌలిక సదుపాయల కల్పనకు ప్రాధాన్యత కల్పిస్తానని హామీ ఇచ్చారు. వైసిపి సీనియర్ నాయకుడు సన్యాసిపాత్రుడు మాట్లాడుతూ ఎన్నికలు కార్పొరేట్ వ్యవస్థకు, సామాన్యులకు మధ్య పోటీగా అభివర్ణించారు. 40 ఏళ్ళుగా పట్టణ ప్రజలతో అనుబంధం ఉందన్నారు. రెండున్నర సంవత్సరాలుగా నర్సీపట్నంలో రౌడీయిజం పెరిగిపోయిందని, తమను గెలిపిస్తే శాంతియుత వాతావరణం అందిస్తామని అన్నారు.