వైసీపీకి అన్నపరెడ్డి విజయభాస్కర్ రెడ్డి రాజీనామా

విజయవాడ, ఉదయం ప్రతినిధి : వైఎస్సార్ కాంగ్రెస్ పార్టీకి మరో ఎదురుదెబ్బ తగిలింది. ఆ పార్టీ సీనియర్ నాయకుడు అన్నపరెడ్డి విజయభాస్కర్ రెడ్డి వైసీపీ ప్రాథమిక సభ్యత్వానికి రాజీనామా చేశారు. విజయవాడ గాంధీనగర్‌లో మంగళవారం నిర్వహించిన విలేకరుల సమావేశంలో తన రాజీనామా నిర్ణయాన్ని వెల్లడించారు. మాజీ ఎంపీ విజయసాయిరెడ్డి త్వరలో ఏర్పాటు చేయనున్న నూతన రాజకీయ పార్టీలో చేరనున్నట్లు ప్రకటించారు. ఈ సందర్భంగా వైసీపీ అధినేత వైఎస్ జగన్‌మోహన్ రెడ్డి వ్యవహారశైలిపై తీవ్ర విమర్శలు చేశారు. పార్టీ కోసం కష్టపడే నాయకులు, కార్యకర్తలకు తగిన గుర్తింపు లభించడం లేదని, అధికారిక సభ్యత్వాలు, పార్టీ పదవుల విషయంలోనూ సరైన విధానం లేదని ఆరోపించారు. గత ఎన్నికల్లో వైసీపీ ఓటమికి అంతర్గత కోవర్టు రాజకీయాలే కారణమని పేర్కొన్నారు. విజయవాడలో వంగవీటి రాధాకృష్ణ గెలుపునకు, గుంటూరులో కూటమి అభ్యర్థుల విజయానికి వైసీపీలోని కొందరు నాయకులే పరోక్షంగా సహకరించారని సంచలన వ్యాఖ్యలు చేశారు. టీడీపీ, జనసేన, బీజేపీ కూటమి ఐక్యంగా ఉన్నంతకాలం జగన్ తిరిగి ముఖ్యమంత్రి కావడం సాధ్యం కాదని వ్యాఖ్యానించారు. సజ్జల రామకృష్ణారెడ్డి పార్టీలో కొనసాగినంతకాలం వైసీపీ మనుగడ కష్టమని విమర్శిస్తూ, పార్టీ అంతర్గత పరిస్థితులపై జగన్ ఇప్పటికైనా దృష్టి సారించాలని సూచించారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.