వైద్యుల ముంగిటకే రిజిస్ట్రేషన్ సేవలు!

కాకినాడలో రెండు రోజుల ఏపీఎంసీ ప్రత్యేక శిబిరం

రెన్యువల్‌ నుంచి అదనపు విద్యార్హతల నమోదు వరకు ఒకేచోట

అక్టోబర్‌ 3, 4 తేదీల్లో రంగరాయ వైద్య కళాశాలలో నిర్వహణ

ముందుగా ఆన్‌లైన్‌లో స్లాట్‌ బుక్‌ చేసుకోవాల్సిందే

ఉమ్మడి గోదావరి జిల్లాల ‘సూర్య’ బ్యూరో — కాకినాడ

రిజిస్ట్రేషన్‌ రెన్యువల్‌ కోసం ఒక ప్రక్రియ.. అదనపు విద్యార్హత నమోదు కోసం మరో ప్రక్రియ.. ఇలా వైద్యులు తమ వృత్తిపరమైన రిజిస్ట్రేషన్‌ సేవల కోసం ఎదుర్కొనే ఇబ్బందులను తగ్గించేలా ఆంధ్రప్రదేశ్‌ మెడికల్‌ కౌన్సిల్‌ సేవలు కాకినాడకే రానున్నాయి. ‘వైద్యుల ముంగిటకే రిజిస్ట్రేషన్‌ సేవలు’ కార్యక్రమంలో భాగంగా అక్టోబర్‌ 3, 4 తేదీల్లో రంగరాయ వైద్య కళాశాలలో జిల్లా స్థాయి ప్రత్యేక రిజిస్ట్రేషన్‌ శిబిరం నిర్వహించనున్నారు.

ఒకేచోట నాలుగు ప్రధాన సేవలు

శిబిరంలో వైద్యుల రిజిస్ట్రేషన్‌ రెన్యువల్‌, రీ-రిజిస్ట్రేషన్‌, అదనపు విద్యార్హతల నమోదు, డాక్టర్‌ సైనప్‌ సేవలను అందుబాటులో ఉంచనున్నారు. దీంతో ఆయా సేవల కోసం విడివిడిగా ప్రక్రియలు చేపట్టాల్సిన అవసరం లేకుండా నిర్ణీత సమయంలో ఒకేచోట వాటిని పూర్తి చేసుకునే అవకాశం వైద్యులకు లభించనుంది.

అయితే శిబిరానికి నేరుగా వచ్చేస్తే సరిపోదు. సేవలు పొందాలనుకునే వైద్యులు ముందుగానే ఆన్‌లైన్‌లో స్లాట్‌ బుక్‌ చేసుకోవాలి. నిర్ణీత సమయంలో అవసరమైన ఒరిజినల్‌ ధ్రువపత్రాలతో పాటు జిరాక్స్‌ ప్రతులను తీసుకుని హాజరుకావాల్సి ఉంటుంది.

నేడు వివరాలు వెల్లడించనున్న ఏపీఎంసీ

శిబిరం నిర్వహణ, వైద్యులకు అందించే సేవలు, అనుసరించాల్సిన విధానంపై ఏపీఎంసీ ప్రతినిధులు శనివారం వివరాలు వెల్లడించనున్నారు. కాకినాడ వెంకట్‌నగర్‌లోని రామ్‌కోసా హాల్‌లో మధ్యాహ్నం 3 గంటలకు ఇందుకు సంబంధించి పత్రికా సమావేశం ఏర్పాటు చేశారు.

ఏపీఎంసీ చైర్‌పర్సన్‌ డా. జి. నందకిశోర్, సభ్యులు డా. కేశవరావు బాబు, రంగరాయ వైద్య కళాశాల ప్రిన్సిపాల్‌ డా. ఉషాకిరణ్ పాల్గొననున్నారు. ఐఎంఏ కాకినాడ శాఖ ఆధ్వర్యంలో ఈ సమావేశం నిర్వహిస్తున్నట్లు శాఖ కార్యదర్శి డా. ఎస్‌.సీహెచ్‌.ఎస్‌. రామకృష్ణ తెలిపారు.

వైద్యులకు అవసరమైన రిజిస్ట్రేషన్‌ సేవలను వారి జిల్లాలోనే అందుబాటులోకి తీసుకురావడం ఈ రెండు రోజుల శిబిరం ప్రత్యేకతగా నిలవనుంది.