ఉద్యోగులకు పోస్టల్ బ్యాలెట్ ఓటింగ్

నేటి దినపత్రిక సూర్య బ్యూరో రాజమహేంద్రవరం మండపేట మండలంలో నవంబర్ 5వ తేదీన జరగనున్న ఎంపీటీసీ, జెడ్పీటీసీ ఎన్నికల నేపథ్యంలో ఎన్నికల విధుల్లో పాల్గొంటున్న ప్రభుత్వ ఉద్యోగులకు పోస్టల్ బ్యాలెట్ ద్వారా ఓటు హక్కు వినియోగించుకునే అవకాశం కల్పించారు. ఇందులో భాగంగా మండపేట మండల పరిషత్ కార్యాలయంలో ప్రత్యేక ఫెసిలిటేషన్ కేంద్రాన్ని ఏర్పాటు చేసి పోస్టల్ బ్యాలెట్ పోలింగ్ ప్రక్రియను సోమవారం ప్రారంభించారు.రిటర్నింగ్ అధికారి టి. రాజేశ్వరరావు ఆధ్వర్యంలో సోమవారం ఉదయం 8 గంటల నుంచి ప్రత్యేక సిబ్బంది పర్యవేక్షణలో ఓటింగ్ ప్రక్రియ ప్రారంభమైంది. సాయంత్రం 5 గంటల వరకు ఈ ప్రక్రియ కొనసాగనుంది.

ఎన్నికల విధుల్లో బాధ్యతలు నిర్వహించే ఏ ఒక్క ప్రభుత్వ ఉద్యోగి కూడా తమ ఓటు హక్కును కోల్పోకూడదనే ఉద్దేశంతో ఎన్నికల సంఘం మార్గదర్శకాల మేరకు ఈ ప్రత్యేక ఏర్పాట్లు చేసినట్లు రిటర్నింగ్ అధికారి టి. రాజేశ్వరరావు తెలిపారు. ఎన్నికల విధుల్లో ఉన్న ఉద్యోగులందరూ ఈ అవకాశాన్ని సద్వినియోగం చేసుకుని తమ ఓటు హక్కును వినియోగించుకోవాలని ఆయన కోరారు.ఈ కార్యక్రమంలో అసిస్టెంట్ రిటర్నింగ్ అధికారి, మండల పరిషత్ అభివృద్ధి అధికారి కె. సత్యనారాయణమూర్తి, డిప్యూటీ మండల పరిషత్ అభివృద్ధి అధికారి డి. శ్రీనివాసు తదితరులు పాల్గొన్నారు. మండల పరిషత్ సిబ్బంది అవసరమైన ఏర్పాట్లు చేసి పోస్టల్ బ్యాలెట్ ఓటింగ్ ప్రక్రియను సజావుగా నిర్వహిస్తున్నారు.