తుఫాను వేళ ఉయ్యూరు ప్రజలు అప్రమత్తంగా ఉండాలి

ఉయ్యూరు, మేజర్ న్యూస్: తుఫాను ప్రభావం నేపథ్యంలో ఉయ్యూరు మున్సిపాలిటీ ప్రజలందరూ అప్రమత్తంగా ఉండాలని కాంగ్రెస్ చైర్మన్ అభ్యర్థి పినమాల నాగ కుమార్ విజ్ఞప్తి చేశారు. రాబోయే రెండు మూడు రోజులకు సరిపడా పాలు, కూరగాయలు, తాగునీరు, నిత్యావసర వస్తువులను అందుబాటులో ఉంచుకోవాలని సూచించారు. లోతట్టు ప్రాంతాల ప్రజలు సురక్షిత ప్రాంతాలకు వెళ్లాలని, అత్యవసరమైతే తప్ప ఇళ్ల నుంచి బయటకు రావద్దని కోరారు. మొబైల్ ఫోన్లు, పవర్ బ్యాంకులను ముందుగానే ఛార్జింగ్ చేసుకోవాలని, తెగిపడిన విద్యుత్ తీగలకు దూరంగా ఉండాలని హెచ్చరించారు. మున్సిపల్ కమిషనర్, రెవెన్యూ అధికారులు తక్షణమే స్పందించి అత్యవసర సేవలను సిద్ధం చేయాలని, ప్రజల సహాయార్థం 24 గంటల హెల్ప్‌లైన్‌తో కంట్రోల్ రూమ్ ఏర్పాటు చేయాలని విజ్ఞప్తి చేశారు. ప్రభుత్వ ఆసుపత్రులు, ప్రాథమిక ఆరోగ్య కేంద్రాల్లో అత్యవసర మందులు, వైద్య సిబ్బందిని అందుబాటులో ఉంచాలని సూచించారు. ప్రజలు ఎదుర్కొనే సమస్యలను వెంటనే స్థానిక అధికారులకు లేదా తన కార్యాలయానికి తెలియజేయాలని, అందరూ కలిసికట్టుగా తుఫాను ముప్పును ఎదుర్కొందామని పినమాల నాగ కుమార్ పిలుపునిచ్చారు.

స్టాఫ్ రిపోర్టర్: ✍️ ప్రేమ్ రాజ్, పెనమలూరు నియోజకవర్గం, కృష్ణాజిల్లా.