తలసేమియా బాధిత గిరిజన చిన్నారుల కోసం యాక్సిస్ బ్యాంక్ రక్తదాన శిబిరం సేవా సంకల్ప అభియాన్‌లో భాగంగా స్వచ్ఛంద రక్తదానం.. దాతలను అభినందించిన రాజ్యసభ సభ్యుడు పాక వెంకట సత్యనారాయణ
భీమవరం, సూర్య న్యూస్: భారత ప్రధాని నరేంద్ర మోదీ జన్మదినోత్సవాన్ని పురస్కరించుకుని సెప్టెంబర్ 17 నుంచి అక్టోబర్ 17 వరకు నిర్వహిస్తున్న సేవా సంకల్ప అభియాన్‌లో భాగంగా భీమవరం చినమిరంలోని యాక్సిస్ బ్యాంక్‌లో స్వచ్ఛంద రక్తదాన శిబిరాన్ని నిర్వహించారు. సామాజిక సేవలో భాగంగా నిర్వహించిన ఈ కార్యక్రమంలో బ్యాంకు సిబ్బంది, ఖాతాదారులు ఉత్సాహంగా పాల్గొని రక్తదానం చేశారు.అల్లూరి సీతారామరాజు జిల్లాలోని గిరిజన ప్రాంతాల్లో రక్తహీనతతో బాధపడుతున్నవారితో పాటు తలసేమియా, సికిల్ సెల్ ఎనీమియా వ్యాధులతో ఇబ్బందులు పడుతున్న చిన్నారులకు అవసరమైన రక్తాన్ని అందించాలనే లక్ష్యంతో ఈ శిబిరాన్ని ఏర్పాటు చేశారు. తరచూ రక్తం అవసరమయ్యే బాధితులకు ఈ రక్తదానం ఎంతో ఉపయోగపడుతుందని నిర్వాహకులు తెలిపారు.ఈ కార్యక్రమానికి ముఖ్య అతిథిగా విచ్చేసిన రాజ్యసభ సభ్యుడు పాక వెంకట సత్యనారాయణ రక్తదాతలను అభినందించారు. సేవా సంకల్ప అభియాన్‌లో భాగంగా నిర్వహించిన ఈ రక్తదాన శిబిరం గిరిజన ప్రాంతాల్లోని తలసేమియా, సికిల్ సెల్ ఎనీమియా బాధిత చిన్నారులకు ఎంతో మేలు చేస్తుందని పేర్కొన్నారు. ప్రాణాలను కాపాడే రక్తదానం వంటి సేవా కార్యక్రమాలను నిర్వహించడం అభినందనీయమని అన్నారు.ఈ శిబిరాన్ని విజయవంతంగా నిర్వహించిన యాక్సిస్ బ్యాంక్ మేనేజర్లు డి. వెంకటపతిరాజు, ఎం. శివరామకృష్ణ, బ్యాంకు సిబ్బందితో పాటు సహకారం అందించిన ఏఎస్ఎన్ రాజు చారిటబుల్ ట్రస్ట్ బ్లడ్ బ్యాంక్ ప్రతినిధులకు ఆయన ప్రత్యేక అభినందనలు తెలిపారు.ఈ కార్యక్రమానికి యాక్సిస్ బ్యాంక్ క్లస్టర్ హెడ్ సీహెచ్ శ్రీనివాసరావు సహకారం అందించారు. గొట్టుముక్కల వెంకట భీమరాజు, ఏఎస్ఎన్ రాజు చారిటబుల్ ట్రస్ట్ మేనేజింగ్ ట్రస్టీ ఏఎస్ఎన్ రాజు, బ్లడ్ బ్యాంక్ మెడికల్ ఆఫీసర్ డాక్టర్ దుర్గా ప్రసాద్, గౌతమ్ చక్రవర్తి, వాడపల్లి రమేష్‌తో పాటు యాక్సిస్ బ్యాంక్, బ్లడ్ బ్యాంక్ సిబ్బంది పాల్గొన్నారు.
రిపోర్టర్ శ్రీనివాస్ భీమవరం పశ్చిమ గోదావరి జిల్లా
