తాగునీటి నాణ్యతపై నిరంతర పర్యవేక్షణ చేపట్టాలి

తిరువూరు, మేజర్ న్యూస్: అర్నబ్ తుఫాను అనంతరం ప్రజారోగ్య పరిరక్షణకు సురక్షిత తాగునీటి సరఫరాపై ప్రత్యేక దృష్టి సారించాలని ఎన్టీఆర్ జిల్లా కలెక్టర్ డా. జి. లక్ష్మీశ అధికారులను ఆదేశించారు. గురువారం తిరువూరు మండలం లక్ష్మీపురం గ్రామంలో పర్యటించిన కలెక్టర్ స్థానిక నీటి ట్యాంకు వద్ద తాగునీటి నమూనాల పరీక్ష విధానాలను పరిశీలించారు. నీటి నాణ్యతను నిర్ధారించేందుకు తీసుకుంటున్న చర్యలపై అధికారులను వివరాలు అడిగి తెలుసుకున్నారు. తుపాను అనంతరం వర్షపు నీరు, మురుగునీరు తాగునీటి వనరుల్లో కలిసే అవకాశం ఉన్నందున అప్రమత్తంగా ఉండాలని సూచించారు. కలుషిత నీటి వినియోగం వల్ల విరేచనాలు, ఇతర వ్యాధులు ప్రబలే ప్రమాదం ఉందని తెలిపారు. నీటి ట్యాంకులు, పైపులైన్లను క్రమం తప్పకుండా తనిఖీ చేయడంతోపాటు, అవసరమైన చోట నీటి నమూనాలను సేకరించి పరీక్షించాలని ఆదేశించారు. ట్యాంకులను శుభ్రపరచడం, నిబంధనల ప్రకారం క్లోరినేషన్ చేపట్టడం, నీటి నాణ్యతపై నిరంతర పర్యవేక్షణ నిర్వహించాలని స్పష్టం చేశారు. ఈ పర్యటనలో తిరువూరు ఆర్డీవో ఎ. కుమార్, స్థానిక అధికారులు పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, తిరువూరు నియోజకవర్గం, ఎన్టీఆర్ జిల్లా.